Thanzara'n Legal Aid Clinic a hawng
Mizoram State Legal Services Authority-in Health Worker Training School, Kulikawna Legal Aid Clinic an din thar chu nimin khan Health minister Lal Thanzara'n a hawng.
Dan hriatna lamah Mizote an la hniam hle tih sawiin Lal Thanzara chuan, "Dan hriat loh hi chhuanlam tlingah pawm theih a nih loh avangin mahni inhumhim nan leh khawtlang thila hmalaknaahte dan hre chunga tih zel hi a him ber fo. Khua leh tui ṭha kan nihna kawngah pawh kan mawhphurhna a ni," a ti a; ram changkang apiangah khua leh tui ṭhain dan an ngai pawimawh tih a sawi.
Minister chuan, Mizote pawh dan hriatna lamah hma an sawn a ṭul tih sawiin, "Mipui ban phâk, dan lama inkaihhruaina leh inkawhhmuhna turin Legal Aid Clinic buatsaih a ni," a ti.
Legal Aid Clinic hi National Legal Services Authority-in kum 2011-ah a ruahman a ni a; Mizoramah pawh State Legal Services Authority kaihhruainain khua leh veng hrang hrangah Legal Aid Clinic 100 chuang din ni tawh.
Health Worker Training School-a Legal Aid Clinic hawnna inkhawm hi principal Dr V Lalhmingliani'n a kaihruai a, Senior Civil Judge Lalduhawmi, Aizawl District Legal Services Authority secretary ni bawkin Legal Aid Clinic pawimawhna a sawifiah a ni.