Minister-in buhfaia lung tel a enfiah

Food, Civil Supplies & Consumer Affairs (FCSCA) minister K Lalrinliana chuan, tun hnaia Nursery Veng retai­ler aṭanga buhfai ipa lung awm chu a hmunah a enfiah a, hmalak zui tum a nih thu a sawi.

K Lalrinliana chuan, buhfai ip tam tak zinga ip pakhata lung a lo awm chu pawi a tih thu sawiin, Hunthar Vengah pawh ip pakhatah buhfai uih a tel tawh thu a sawi a, "Hetiang thil a thlen nawn tawh loh nan sorkarin hma a la. Buhfai chhia leh ei tlak loh thleng ngai a awm hian sorkarin sum tam tak a hloh phah ṭhin a, retailer-te pawhin buhfai ṭha lo an sem chhuah lohna tura an fimkhur a ṭul a ni," a ti.

MNF ṭhalaite tarlan danin, Nursery Venga lung awmna buhfai ip chu FCI kudam, Tanhril aṭanga lak nia hriat a ni. Nursery Veng retailer hnen aṭanga lung awm buhfai sem chhuah chungchangah department-in FIR an thehlut tawh a, police-te'n a ṭul angin hma an la mek a ni.