Ramria a dâwih zawk nih reng hi A tlâwm thlak kan ti - Lalfakzuala

Ṭangrual pawl, Zoram Peoples' Movement (ZPM) Val Upa Council (VUC) chairman leh Mizoram chief secretary hlui Lalfakzuala chuan, MZP-te'n Bairabi Zophaia Zofate Chawlhbûk an sakna hmun chu Mizoram chhung ngei a nih thu a sawi a, "A dâwih zawk nih reng hi a tlawm thlak kan ti a, zirlaite kan ṭan tlat a ni," a ti.

ZPM hruaitute hian nimin khan Ritz Hotel-ah thuthar thehdarhtute an kâwm a; Lalfakzuala chuan kum 1995 vel khan ramri vela awm vai hoin misual rual (gunda)-te ruaiin, tuna Zophai tih taka Mizo leilet neite chu buh seng sa an lak an phalsak lo tih a sawi a, "Leilette chu Assam chhunga awm a nih thu an sawi a. Chief Secretary ka nih lai a ni a, Aizawl DC leh Hailakandi DC-te inbiain, leilette chu Mizoram chhung ngei a ni tih finfiah (prove) a ni," a ti.

Aizawl DC leh Hailakandi DC inbiak hnu lawkah ramri hnaiah police outpost siam a rawt thu sawiin Lalfakzuala chuan, "Ṭawngkamin Chief Minister remtihna ka la a, police leh PWD hotute nen hma kan la a ni. A theih ang angin post kan dap kual a, a hmun thlan dawn leh outpost siam a nih hnuah a hmun ngeiah ka kal a ni," a ti a; outpost hming, tuna a area hming ni zui ta 'Zophai' tih hi a phuahtu a nih thu a sawi.

ZPM VUC Chairman chuan, Zophai outpost-a police-te chu ramri venghim tlat tur leh buaina a awm phawt chuan tîm hauh loa a ṭul anga che tura hriattir an nih thu a sawi a, "Rei tak chhung chu buaina a awm zui lo. Hetiang ni si enga ti nge ṭhenawm vaite'n Zophai an rawn chuh ngam leh tak tih hi ka zawhna a ni," a ti.

Buaina a chhuah hnuah pawh Mizoram sorkar/police an chêt loh chhan chu a zawhna a nih thu sawiin Lalfakzuala chuan, "Lu chhum bán chhum huama Zoram humhalh tumtu zirlaite thlavâng pawh kan hauh ngam ta lo em ni?" a ti a; ZPM chuan ram leh hnam himna a ngaih pawimawh thu a sawi.

Lalfakzuala chuan, ramri chungchanga intihbuaina chu thil thar a nih loh thu sawiin, "Kum 1832-a British-in Cachar a rawn awp hnu rei lo tê aṭanga tun thlengin a khát tâwkin buaina a chhuak reng a ni," a ti.

Lalfakzuala sawi danin, Mizote'n kan pawm theih leh kan hriatpui ramri awm­chhun, Suakpuilala leh Lister-a te inremna ramri chauh a ni.

Tuna ramria ngaih, Vairengte khaw lai kaltlang chu Mizoram state a nih hma chuan ramri-ah pawm a ni ngai lo. Bristish hun hmain Mizo pipute'n Zoram humhalh an tum ṭhin a, Bristish awp beh chhungin lalte'n engmah an sawi thei lo.

Mizoramin District Council a nei a, July 1965-ah Vairengte kaltlang ramri chu ramri dik a nih loh thu resolution pass a ni. Assam sorkar nen inbiakna neih a ni a, mahse, ram a buai tâk avangin chhunzawm theih a ni lo.

Mizoram union territory a nih tirhah Ch. Chhunga kaihhruai sorkarin Rev. Zairema hoin ramri chungchangah Fact Finding Committee a din tih sawiin Lalfakzuala chuan, "An report behchhanin Prime Minister hnenah memorandum an thehlut a. Brig. T Sailo ministry pawhin Brig. Vankunga hoin Boundary Commission hial a din. Mahse rambuai kan nih avangin heng hmalaknate hian awmzia a nei thei tak tak lo," a ti.

Lalfakzuala chuan, kum 1986-a India sorkar, MNF leh Mizoram sorkarte'n remna thuthlung an ziahah, a hma zawnga Mizote'n an pawm theih ngai loh, Vairengte kaltlang ramri pawm a nih thu a sawi a, "He inremna thuthlung behchhan hian Parliament chuan 'The State of Mizoram Act, 1986 siamin, he ramri hi tihngheh a ni," a ti a; inremna thuthlung chuan ramri chungchanga Mizoram ṭanna ṭhin a pheh thu a sawi.

Remna thuthlungin Congress leh MNF-te chu ramri chungchangah hma la thei lo turin an kut a phuar tlat nia sawiin Lalfakzuala chuan, "ZPM chauh hi hma la thei kan ni a, sorkarna kan chan chuan chak takin hma kan la dawn a ni," a ti.

ZPM VUC vice chairman leh Mizoram DGP hlui F Lalremsiama chuan, ramri buaiah Naga ho chuan an ram chin nia an hriatah kawng siamin, mihring an chêntir ṭhin tih sawiin, "Keini pawhin kan awmchilh ve mai tur a ni. A ṭul chuan a awm duhte chu pawisa kan pe mai ang. Ch. Chhunga ram ngeia MZP chawlbûk min ṭhiahsak te, kan police-te ngeiin Vairengte daia chawlhbûk sak an ṭhiatte hian ka rilru a tiná a ni," a ti a; ramri chungchangah chuan hrui khat vuana kal a ṭul thu a sawi.