CYMA-in ṭan la zel turin YMA-te a ngen

Khawvel ram hrang hranga Coro­navirus (Covid-19) leng mek lakah Mizoram a him theihna tura kawng hrang hranga YMA sub-headquarters, group leh branch-te'n ṭhahnemngai taka hma an la chu lawmawm a tih thu Central YMA chuan a tarlang a; ṭan la chhunzawm zel turin a ngen nghal.

CYMA chuan, ramri depa awm YMA sub-headquarters, group leh branch-te chu thâ thlah loa ṭhahnemngai taka ramri ṭha taka vil zel turin a chah a, "Mizoram páwn aṭanga rawn hawte’n sorkar ruahman anga ni 14 tal mahni an inkhung hran theih nan kan hmazawn ṭheuhah hmalak a, thuneitute ṭanpui ni se," an ti.

Inzirtirna a remchan anga uar zawka kalpui tur te, mahni awmna ṭheuhah thianghlimna lama ṭan la tur te, kut sil uar tur te, ṭul loa punkhawm, pumpelh theih chite pumpelh hram rih turtein CYMA chuan YMA-te a chah a, "Hriléng vanga ei leh bara harsatna tâwkte leh tuamhlâwm ngaite a theih anga ṭanpui ni se. Hri léng vanga chhiat tâwk, ruang buaipui ngai kan awm a nih pawhin sorkar ruahmanna ngaihchân thiam ni se," an ti bawk.