MZP-te'n chawlhbûk sak ngei an tum : Central YMA-in a hmunah an tlawh

MZP-te leh Assam Police-te inkara buaina chhuahna hmun, Bairabi Zophai chu nimin khan Mizoram sorkar aiawhin political adviser to chief minister Lalrinmawia Ralte-in a tlawh a, MZP-te chu Zofate Chawlhbûk sa lo turin a ngen. MZP-te erawh chuan, chawlhbuk sak chu an ṭhulh theih loh thuin an chhang thung.

Lalrinmawia Ralte chuan, ramri chungchang chuan Chief Secretary level a thlen tawh thu sawiin, "Inbiakna a kal thuai dawn a. Hetianga chawlhbûk sak a nih avang hian ramri chinfel ngawt theih a ni lo," a ti a; MZP-te chu chawlhbuk sak an tum chu ṭhulh turin a ngen a ni.

MZP hruaitute chuan, Lalrinmawia Ralte ngenna chungchang chu an ngaihtuah hnuah, Mizoram sorkar leh Assam sorkarin inremna an nei a nih loh chuan Zofate Chawlhbuk hi sak ngei ni se, an ti.

Zophai hmunah hian March 8, Ningani zan aṭang khan MZP mi leh sa eng emaw zat an riak a, nimin zing khan mi eng emaw zat chu Aizawl aṭangin an kal belh leh bawk a, Zofate Chawlhbuk sak ngei an tum. Assam Police-te pawh Magistrate hoin eng emaw zat chu MZP-ten chawlhbuk sak an tumna hmunah an awm reng a ni.

MZP-te hi Ningani zan khan Central YMA hruaitute'n an tlawh a, an thil tih tum chu an thlâwp thu an hrilh. Nimin khan MNF MLA pahnih K Sangṭhuama leh Dr K Beichhua te pawhin MZP-te chu an tlawh a ni. Mizo Students' Union hruaitu ṭhenkhatte pawhin MZP hi an ṭawiawm bawk.

Nizan khan ZPM ṭhalai hruaitute'n an chairman Lalmuanpuia Punte hoin Zophaia MZP-te hi an tlawh a, Rs. 2,000 an pe a ni.