KHAWTHLIR

College khâr
Mamit College-a thawk ṭhin assistant Sapliannguri chu Divisional Forest Office, Mamitah sawn a nih avanga lungawi lohna lantir nan leh Mamit College-a dah lêt leh tura sorkar kar nan Mamit College Students’ Union chuan nimin aṭang khan tiam chin awm loin college an khâr.

Khampat Bung Chhehvel tifai
Hrangbana College-a Mizo department leh Tahan, Myanmar-a Zawlbuk Committee, Mizo Ṭhalai Pawl Khampat unit leh Charity (Khampat) ṭangkawpte chu nimin khan Khampat Bûngpui chhehvela bawlhhlawhte tifaiin an hnatlang. Hrangbana College-a Mizo department zirlaite'n Khampat Bungpui an tlawhna tur hian Mizoram Rural Bank leh East Tuipui bialtu MLA T Sangkunga ten sum an pek bakah, zirlaite leh zirtirtute'n an thawh khawm a ni.

Mibo zawng hmu
March 6, 2018 zing aṭanga chin hriat loha awm Freddy VL Ngheta (17) s/o C Lalenghluna (L), Hnahthial Peniel Veng chu khawtlangin ni li chhung an zawn hnuah nimin zing dar 8:40 vel khan Lunglei leh Hnahthial inkara Mat lei chhakah dam taka hmuh a ni. Hnahthial damdawi-inah panpui niin, enkawl mek nghal a ni a, ngaihtuahawm a ni loa thu dawn a ni.

Power Plant
Assam Rifles-in civic action programme hnuaia cheng nuai 25 senga an siam, 7.5KVA Lungpuk Solar Power Plant chu nimin khan Hqrs. 23 Sector ṭangin AR director general Lt. Gen. Shokin Chauhan-a'n a hawng. 7.5KVA Lungpuk Solar Power Plant hmang hian Lopu khuaa chhungkaw 255 bakah community hall, sikul pathum leh biak-inte kawlphetha pek a ni ang.