AMC Chairman hluiin Congress a zawm Kan rinchhan chu Pathian a ni - Hawla

Zoram Nationalist Party (ZNP)-a political advider to president Zarzoliana, Aizawl Municipal Council (AMC) sorkar term hmasa bera chairman ni tawh chu nimin khan Congress party-ah MPCC president Lal Thanhawla'n a lawm lut. Lal Thanhawla chuan, Kan rin chhan leh tlawh chhan hi Central Congress an ni lo a, kan rinchhan chu chunglam Pathian a ni," a ti.

Lal Thanhawla chuan, MNF sorkar laiin Mizoramah hel an hluar a, Aizawl daiah pawh hel training-na hmun a awm tih sawiin, "Congress a sorkar a, hel khawi, hel training-na hmun, bank lem leh chiahpuam tihte a bo nghal vek a ni," a ti a; Congress a sorkar apiangin Thlarau Thianghlim a zalen a, Mizorama harhna thleng ṭhin pawh Congress sorkar lai zel a nih thu a sawi.

Tun hnaia hmarchhak state pathuma inthlanah Congress party tla mah se, Hindutva movement-in Mizoram a khawih chet ve loh thu sawiin Lal Thanhawla chuan, MLA tlemte nei chunga BJP-in sorkarna an siam theih chhan chu politician-te rinawm loh vang te, sum an duh lutuk vangte leh Hindutva hlauhawmzia an hriat loh vangte a nih thu a sawi a, "Suma lei theih politician an tam a, an awhawm loh hle a ni," a ti.

Mizorama kohhran hruaitute pawhin Hindutva an buaipui hle a, hmun hrang hrangah an sawi tawh tih sawiin MPCC President chuan, "Kohhran hruaitute'n Hindutva an duh lo a. Kan kohhran hruaitute thu hi kan zah a ngai a, thlarau thila an hmalaknate kan ngaihthlak thiam a ngai," a ti. MNF-te chu direct-a BJP zawm ngam si loin, NEDA hmangin an zawm niin a sawi.

Lal Thanhawla chuan, BJP-te chuan an hmalakna tichak turin zirlai pawl, ABVP an nei tih sawiin, "Kan rama college-ahte pawh rawn luh an tum a; GAC-ah phei chuan zirtirtu pakhat hmathehah an hmang a, hei hi zirtirtute tih miah loh tur a ni. Kohhran hote pawhin an duh loh a ni," a ti.

Chief Minister Lal Thanhawla chuan, Sairang leh Kawrpuichhuah inkara rel kawng siam turin survey zawh a nih tawh thu leh, Kawrpuichhuah aṭanga Lawngtlai inkara rel kalna tur pawh tun ṭhál chhungin survey zawh theih beisei a nih thu a sawi bawk.