AYUSH doctor-te'n conference an nei

Mizoram AYUSH Doctors’ Association (MADA) chuan nimin khan Tourist Lodge, Chaltlangah 13th. General Conference an hmang a, Health minister Lal Thanzara chu khuallian a ni. Minister chuan, OPD-a mi harsa tak tak inentir tura kalte uluk taka lo en a, ngaihsak ṭhin turin a chah.

Lal Thanzara chuan, AYUSH hnuaia inenkawlnate chu a hautak loh avangin mi harsa leh rethei zawkte ban phak a nih thu leh damdawite pawh a thlawna pek chhuah a nih thu a sawi a, "Integrated AYUSH Hospital, Thenzawla mi pawh mipuiin an chhawr ṭangkai hle a, AYUSH doctor-te hi a neitu an nih angin, theihtawp chhuah inchhuah a ngai a ni," a ti.

Health Minister chuan, district hospital tinah AYUSH OPD a awm tawh thu te, CHC leh PHC ṭhenkhatah pawh AYUSH medical officer-te dah a nih thute a sawi bawk.

MADA hi kum 2004-ah Mizoram Homoeopathic Doctors’ Association tih hminga din a ni a, kum 2009-ah homoeopathy leh ayurvedic doctor-te infin khawmin, MADA tiin hming an thlak a, member 169 an awm mek a ni. MADA conference hi an president Dr C Vanlalhlimpuia'n a kaihruai a ni.