Assam police kutah Mizo 50 chuang hliam : Vawiinah Mizoram pumah kawngzawh dawn

March 10, Inrinni khan Bairabi Zophaiah MZP leh Assam Police-te an innawr buai a, Assam Police-te'n silai hmet puakin mi pahnih an kâp fuh a, tianga mi an vuakte nen mi 50 chuang an hliam. MZP-te hian vawiinah Mizoram pumah kawngzawh an huaihawt dawn.

MZP-in vawiina kawngzawh an huaihawt turah hian, Aizawlah chuan chawhma dar 10:30-ah Sikulpuikawn leh Chanmari kawn aṭangin zawh ṭan tur a ni a, Vanapa Hall kawt panin an kal ang a, Vanapa Hall kawtah an intawk khawm ang. MZP chuan kawngzawhah hian tel turin mi zawng zawng an sawm a ni.

MZP-te hian Inrinni chawhma dar 11 velah an bûkah inkhawm an buatsaih a, infuihna hun leh Pathian hnena inhlanna hun an hman hnuah hriamhrei keng loin Zofate Chawlhbûk sak an tumna hmun chawhma dar 11:45-ah an pan a; Bairabi aṭangin mi eng emaw zat an thawk chhuak ve bawk.

Assam Police-te chuan MZP-te leh anmahni ṭawiawmtute chu an lo dang a, minute hnih vel an innawr buai deuh hnuah Assam Police-te chuan van lama kâp hmsa loin mihring lam hawiin silai an hmet puak a, vawi riat vel an kap a, MZP member pahnih an kap fuh. Tiang hmangin an vaw bawk a ni.

MZP member-te an tlan darh hnuah bike, taxi leh maxi-cab pakhat tihchhiat a ni a; MZP camp-te pawh Assam Police-te'n an hâl vek a, mobile phone, thawmhnaw, ei rawngbawlna hmanruate leh thil dangte a bo vek bawk.

Assam Police-te silai kah vang leh mi an vuak avangin mi 50 chuang an hliam. Hliam zingah Aizawl aṭanga journalist kal panga leh Kolasib-a journalist-te an tel a, an zinga pahnih chu Aizawla journalist hmeichhia an ni.

Hliamte chu Bairabi damdawi-inah hruai an ni a; silaia an kah pakhat zawk Ricky Lalchhandama (MZP secretary)chu a kêah silai mû a tàn avangin Kolasib District Hospital panpui nghal niin, pakhat zawk erawh a keah kah pial a ni. Hliam zinga pahnih - MZP member leh Bairabi khaw mi chu an nat deuh avangin Aizawl Civil Hospital-ah admit an ni.

MZP president L Ramdinliana Renthlei chu Bairabi Police Station-ah kalin, police-te chu anmahni chhan tur leh an naute an hmuh kim lohte zawng turin a ngen a, mahse, police lam an kal duh loh avangin, anmahni'n an zawng a ni.

Darkar khat hnu velah an inhmu kim thei a; an kim hnuah Bairabi PS-ah an kal a, gate tualah police-te'n lo dang. MZP-te hi Mizoram Chief Minister leh Home Minister báng tura an phût thuin an au rual a ni.

Bairabi damdawi-in lamah an kalkhawm leh a, inkhawm tawi an buatsaih hnuah vice president Vanlaltána hoin hliamte chuan Aizawl lam an pan. MZP President leh Aizawl City College Joint Student Union hruaitu pakhat chu Bairabi damdawi-inah admit an ni a, anni hi Bairabi-ah an chám hrih dawn.

Damdawi-ina an awm lai hian Mizoram sorkar official-te chuan MZP hruaitute chu telephone hmanga biain, Cachar Addl. SP-in Bairabi PS-ah a biak duh thu an hrilh a; MZP hruaitute erawh chuan a hma zawnga be duh lo, silai hmanga an kah hnua biak tum chauh chu an hriatthiam lo thua chhángin, an kal duh lo.

MZP thuchhuah chuan, "Ramri buai chinfel hi MZP kuta awm a ni lo tih leh zirlai pawl chinfel theih a ni lo a nih pawhin, a chingfel theitu Mizoram sorkar a mutthluk avangin insit tak chungin MZP hian ke a pen a ni. Mizoram sorkarin a tih tur a tih loh vangin Mizo ṭhalaite an chet a ngai ta a, ṭhalaite'n hliam an tuar ta a ni tih hi Mizoram sorkar hruaitute'n lo hria se kan duh," an ti.

MZP chuan, Bairabi dai vel chu ram inchuh a ni tih a nih avangin kut thlak loh tur a ni tih ni mah se, Assam lamin duh tâwkin hna an thawk a, kut an thlak tih an sawi a, "Sikul an din a, police outpost an siam a, chutiang thil ngawi renga thlir thei sorkar kan neih avangin, MZP chuan Assam-in ram an rawn zauh zel loh nan, ram hauh nan chawlhbûk sak a tum ve ta a ni," an ti a; Assam sorkarin Mizoram chhunga Cr.PC 144 a puan khum laia Mizoram sorkar a ngawi reng theih chu an dem thu an tarlang.

MZP president L Ramdinliana chuan, Zofate Chawlhbûk an sak theih hma chuan Bairabi-ah a châm dawn thu Vanglaini palai a hrilh a, "Silai hmanga min kah hnu pawha chhantu kan la nei lo hi kan rilru a na tak zet. Zofate Chawlhbûk sak ngei kan tum tlat a ni," a ti. Assam police ṭhenkhat chu tawlh kîr tawh mah se, eng emaw zat chu nimin tlai dar 4 thleng khan Zophaiah an la awm tih a sawi bawk. MZP member Aizawl pante hi Inrinni zan khan Vanapa Hall kawtah mi eng emaw zatin an lo hmuak a, pawl hrang hrang hruaitute'n an thlavang hauhna thu an sawi a ni.

Zophaia MZP resolution
* Zophaiah hian Zofate Chawlhbûk sak ngei a nih theihna atan hmalak chhunzawm zel ni rawh se.
* Inner Line Reserved Forest area a nih angin dan bawhchhiaa Assam sorkarin kut a thlak mek hi tihtawp a nih theihna atan Mizoram sorkarin hma la rawh se.
* Assam sorkarin Inner Line Reserved Forest-a Assam Police-in out post leh sikul an sak bakah, Chakma leh Tuikuk raltlante in leh lo an dinsak hi a rang thei ang bera tihtawp a nih theihna atan Mizoram sorkarin hma la thuai rawh se.
* Inne Line Reserved Forest-a Assam sorkarin in leh lo a din zawng zawngte hi Mizoram sorkarin ṭhiat tura hma an la thei lo a nih chuan Mizo ṭhalaite'n hma kan la chhunzawm dawn.
* Mizoram sorkarin MZP-te mi tiam ang ngeiin, Inner Line Reserved Forest area high level-a indawrna nei a, rang taka tihhlawhtling turin kan phût. MZP chuan Mizoram sorkar hmalakna chik takin a en zui zel dawn a ni.