Mizo zirlaite Assam police kutah thi mah se Mizoram sorkarin pawi a ti lo - ZPM Ṭhalai

Zoram Peoples' Movement (ZPM) ṭhalai hruaitute chuan nimin chawhnu khan Ritz Hotel-ah thuthar thehdarhtute kâwmin, Bairabi Zophaia March 10, Inrinnia buaina thleng chungchanga a hmuna an hmuh dan an sawi a; Mizo zirlaite chu Assam police kutah thi vek mahse Mizoram sorkarin pawi a ti miah loa an ngaih thu an sawi.

ZPM ṭhalai chairman Lalmuanpuia Punte chuan, "Zofate Chawlhbûk sakna tur hmunah hian Hailakandi ADM leh Additional SP-te firing order nei sain an awm tih Mizoram sorkarin a hre chungin medical team a dah miah lo kha a mak," a ti a; Mizoram police-te chu MZP thlavâng hauh tur leh chhan turin a hmunah an awm lo a, MZP-te riahna bula Assam sikul pakhat chu MZP-in an tihchhiat hlauin an veng zawk tih a sawi.

ZPM ṭhalaite sawi danin, Assam police-in Mizo zirlaite an vuak darh leh silaia an kah chu Inrinni chhun dar 12 vel a ni a, a hnu darkar khat velah MZP President leh Adviser-te Bairabi Police Station-ah kalin ṭanpuina an dil a, Bairabi PS-ah chuan Kolasib DC leh SP-te chu kawngka inkalh khungin MZP hruaitute chu an ngaihsak duh lo a, beidawngin an let leh a ni. Chumi hnuah pawh zirlaite chu Bairabi PS-ah an kal leh a, PS area-ah pawh luhtir an phal lo a ni.

MZP-te riahna bula thlám pahnih chu March 9 zanah MZP tihmualpho tumte'n an hâl tih sawiin Lalmuanpuia Punte chuan, "Pakhat zawk chu a thlám neitu vai hâl a nih hmel," a ti a; Inrinnia buaina a chhuah hnuah Mizoram motor taxi pakhat, car pakhat, Sumo pakhat leh bike pahnih tihchhiat a ni tih sawiin, "Bike pakhat hâl a ni a, mobile phone 40 vel leh laptop pathum tihchhiat a ni. Thil tichhetute hi Assam police ni loin, a bul vel khawtual mi vai an ni," a ti.

Inrinni buaina thlen ní hian MZP pui tur leh an thlavâng hauh tuma kal tur motor zawng zawng chu Rengtekawnah Mizoram police-in an dan vek thu leh, Mamit lam aṭanga kal tumte pawh Mamit khawpuiah dan beh an nih thu a sawi bawk.

Lalmuanpuia chuan, Mizoram sor­kar­in Mizo zirlaite chu Assam police kutah an awm awma awm turin an en liam nia sawiin, "Silaia kah an nih hnua MZP hruaitute zualko pawh lo be duh loa Kolasib DC leh SP-te Bairabi PS-a kawngka an inkalh hnan tlat hi a makin a rapthlak hle. Mipui harsatna pawh an ngaihsak miah lo hi a rûnthlak a, sor­karna hi thlaruk lek pawh chelh tlak an ni tawh loah kan ngai," a ti.

ZPM ṭhalaite chuan Mizoram sorkar chu engchin nge Mizoram ramrîa a pawm tih zawtin, an dinna chiang taka mipui hnena puang turin an phût a; status quo maintain anga an insawi chungchangah, engtikah nge Mizoram leh Assam sorkarin status quo vawng tura inremna thuthlung an siam tih pawh an zawt a ni.

MNF party-te chu ramri chung­changah chuan vir buai ve ngam turah an ngaih loh thu an sawi bawk.