MNF MLA-te'n Bairabi Zophai an tlawh "He hmun hi kan ram a ni" - Vanlalzawma

MNF MLA ṭhenkhat leh hruaitu ṭhenkhatte chuan nimin khan Bairabi Zophaia MZP-in Zofate Chawlhbuk sak an tumna hmun Ch.Chhunga (L) leilet an tlawh a; MNF treasurer Vanlalzawma, MLA chuan, "He lai hmun hi hmasang aṭangin kan ram a ni a, a ni zel bawk ang," a ti.

Nimina Zophai tlawhtu MNF-te hi Vanlalzawma bakah, Lalrinawma (MLA), AMC mayor PC Lalhmingthanga leh hruaitu dangte an ni a; a hmuna awm Amalendu Roy, Hailakandi additional DC-in a lo dawngsawng.

Vanlalzawma chuan press mite zawhna chhangin, Zophai chu hmanlai aṭang tawha Mizoram a nih thu a sawi a; Assam lamin an ta chei a, an awm chilh chu ná a tih thu sawiin, "Anni lam sorkar thuneihna kim nen an ṭhut hmuk laiin, Mizoram sorkar lam kan reh hmak mai hi a ná ka ti tak zet a, a tlàwm thlak ka ti vawng vawng a ni," a ti.

MLA Vanlalzawma te hian Assam Police kut tawrh vanga Bairabi PHC-a awm mek MZP president L Ramdinliana Renthlei leh ACCJSU president Lalnunpuia te an kan nghal a; Assam Police-in an kah hliam Ricky Lalchhandama s/o Lalrinpuia, Kulikawn chu Kolasib District Hospital-ah an kan bawk.

Hetih lai hian, MNF party office bearer-te chuan Inrinni khan Mizo Hnam Runah senior vice president Tawnluia hoin emergency meeting an nei a; resolution pass in, "Hetiang khawpa Mizoram chhunga Assam sorkar a chet hnuah leh Mizo zirlai tam takin hliam an tawrh hnu pawha Mizoram sorkarin an thlavâng pawh a hauh ngam lo hi kan dem tak zet. Hetiang baka law & order hlawhchhamna hi a awmin kan hre lo a, law & order kengkawh zo lo CM Lal Thanhawla leh Home minister R Lalzirliana te hi báng vat rawh se," an ti. Zirlai hliamte chu zangnadawmna pe ngei turin sorkar an phût a ni.

MNF hian nimin tlai khan Mizoram Governor hnenah Assam Police-in zirlai kut an thlak leh lirtheite an hâl avangin inrawlh tura ngenna lehkha an thehlut a ni.