BCM-in Missionary Day sorkar holiday pangngaia puan an duh

Baptist Church of Mizoram (BCM) rorelna sang ber, Assembly chuan, Missionary Day - January 11 chu sorkar pisa chawlh ni, holiday pangngaia puang turin Mizoram sorkarah ngenna thlen an rel.

BCM Assembly hi March 7, 2018 zan khan Lunglei Zotlang biak-inah ṭan a ni a, nizan khan a ṭiak. March 8 khan BCM president kal chhuak Rev. H Lianngaia'n chairman thar Rev. Lalbiaksanga Chinzah hnenah mawhphurhna a hlan a, Chairman thar kaihhruaina hnuaiah rorel palai 1,034-te'n ro an rêl a ni.

BCM Assembly-ah hian March 8-10 chhung khan rorel inkhawm neih a ni a; an thurel zingah Mizo­ram pum huapa ṭawngṭai inkhawmpui neih te, sacramental wine atan Hnah­lan Grape Growers’ Association-te wine siam lei ṭhin chu ennawn te, kum­in kum tawp lama Mizoram Assembly inthlanna awm tur ṭha taka neih a nih theih nan Mizoram pum huapa ṭawngṭaite a tel.

Pastor bial thar pahnih - New Serchhip bial leh Saitual bial hawn an rel a, pastor pariat leh thawktu dang 12 lak belh an remti a; kum 2019 Assembly-a chairman atan Rev. PC Liandula an thlang.

BCM Assembly-ah hian Mizoram Synod aṭangin Finance officer Rev. H Remthanga leh Lalhmasaa te an tel a; kohhran pawl dangte pawhin palai an tir a ni.