MSU-in CM an hmu; vai chhuah an khap

March 10, Inrinnia Bairabi Zophaiah Assam police-te'n Mizote laka silai an hmeh puah leh mi

ṭhenkhat an hliam chungchangah Mizo Students Union (MSU) hruaitute chuan Inrinni chawhnu khan chief minister Lal Thanhawla chu CMO Conference Room-ah an hmu. MSU-te hian Mizorama hnam dangte chu páwna chhuak lo turin an hriattir nghal a ni.

Sorkar thuchhuah tarlan danin, MSU hruaitute'n Assam Police-te chu darkar 24 chhungin Zophai aṭang insaseng turin Mizoram Chief Minister-in hma a lak an phût chu CM Lal Thanhawla chuan, inhriathiam tawnnaa insaseng ve ve phawt a pawimawh thuin a chhang a; Bairabi buaina chinfel a nih theih nan hmalak mek a ni thu MSU hruaitute a lo hrilh.

An inkawm lai hian Assam chief minister Sarbananda Sonawal-a'n CM Lal Thanhawla chu telephone-in a rawn bia nia tarlangin sorkar thuchhuah chuan, "Ramri chungchanga buaina awm chu pawi a tih thu leh insaseng ve ve phawt chu tih tur hmasa nia a hriat thu a rawn sawi a ni," a ti.

CM Lal Thanhawla'n chief aecretary Arvind Ray chu hmalak tawh chin a zâwt a, "Chief Secretary chuan Assam Chief Secretary-in inbiakna nei tura a rawn biak tawh thu leh Mizoram páwn an pawm tawh thu leh hun remchang hmasa bera inbiakna neih a nih tur thu a sawi a ni," a ti bawk.

CMO bulah hian MSU bultumin zirlai eng emaw zat an pung khawm a; resolution siamin, Mizo zirlai leh mipui, Assam Police kut tuarte zawng zawng Assam sor­karin zangnadawmna leh in enkawlna senso a tum vek tur a ni, an ti.

MSU resolution chuan, Assam police-te chu Zokhai aṭangin resolution an siam aṭanga darkar 24 chhung­in an tawlh kîr tur a ni, an ti a; thu leh awm hma chuan Mizorama hnam dang (vai) awmte páwna an chhuah an khap nghal. Thu leh awm hma chuan North East Frontier Railways hnuaia Mizorama company-te hna kal lai an châwl vek tur a ni, an ti a; Mizoram sorkarin Mizo zirlaite thlavâng hauh tura police a tír ngam lo nih chuan zirlaite hnenah ralthuam pe rawh se, an ti bawk.

MSU hian Mizoram hmun hrang hrangah hnam dang (vai)-te pawna chhuak lo turin an hriattir nghal a, hei vang hian khawlaiah vai hmuh tur an awm lo a, Aizawl bakah, khaw hrang hranga hnam dang dawrte chu a inkhâr a ni.