Aibawk Water Supply Scheme hawn a ni

Aibawk, Phulpui leh Sateek khuate tui pekna tur Aibawk Water Supply Scheme chu March 10, Inrinni khan PHE minister Zodintluanga'n a hawng.

Aibawk Water Supply Scheme hawnna inkhawm hi Aibawk BNRGSK Hall-ah neih a ni a, chumi hnuah tui lakna hmun, Phulpui rama Tuirivang luia pump house-ah hawn a ni. PHE Minister chuan, khaw pathuma chengte an ina tui an herh haw theihna tura tui lakna hawn a ni ta hi lawmawm a tih thu sawiin, "Tun hma chuan tui a harsa a, zan leh chhunah tuikang nghahte a ngai ṭhin. Tunah chuan tui in tur thianghlim an nei thei ta a ni," a ti.

PHE Minister chuan, khaw pathumte chu an tui tlan, Tui­rivang lui tui a kang mai loh nan leh tuihna tam zawk a awm theih nan lui chhehvelte humhalh turin a chah a; Mizoramin hruaitu ṭha a mamawh ber tih sawiin, kum 10 chhunga hmasawnna leh a hma lam zawnga hmasawnnate awmte khaikhin ṭhin turin mipui a chah bawk.

Aibawk Water Supply Scheme hawnnaah hian bial­tu MLA KS Thanga, minister of state chu khualzahawm a ni a; hawnna inkhawm chu PHE engineer-in-chief Lalmuanzova'n kaihruaiin, superintending engineer HC Lalnunzira'n technical report a pe a ni.

Aibawk Water Supply Scheme hi Ministry of DoNER-a NLCPR aṭang sum hmuh cheng nuai 979.42 hmanga siam a ni a, kum 2014-ah siam ṭan a ni. A hmangtu tur Aibawk, Phulpui leh Sateek khuaah hian kum 2011 chhiar­pui ang chuan mi 3,242 an cheng a, mi pakhatin ni tin tui litre 70 an dawng thei tura ngaih a ni.