Thu dik lo thehdarhtu mi 15 man tawh

Mizoram Police hotute chuan nimin khan Aizawl SP conference hall-ah thuthar thehdarhtute an kâwm a; social media-a Coronavirus (Covid-19) chungchanga thu dik lo leh mipui tithlabár thei thehdarhtu mi 15 an man tawh thu an sawi.

IGP LH Shanliana chuan, Covid-19 avanga inkhawm ṭhulh hialte a ngaih laia dâwta thuthang dik lo leh mipui ti chîâi thei thehdarh a ni chu pawi an tih thu sawiin, "Chhui zel kan tum. Thu dik lo thehdarhtute

ṭhenkhat chu a pawi tih an hre lo, a ṭhen chu mi tihphâwklêk tum hrim hrim an ni thei. Ti tawh lo tura kan tih hnuah pawh ti an awm zel. Kum thum thleng táng tura hrem theih an ni," a ti.

IGP sawi danin, Covid-19 chungchanga thuthang dik lo thehdarh a nih hmasak ber ṭuma thubuai an ziah luhah mi 14 an man a, a ṭum hnihnaah mi pakhat an man leh a ni.Nimin lama thu thehdarh, chief secretary Lalnunmawia Chuaungo tihchhuah anga tarlan 'Mizoram haw lo Mizote chu Mizoah ngaih an nih tawh dawn loh chungchang' pawh police-te chuan an chhui zel a, a thehdarhtu an hre tawh a, man erawh a la ni lo.

Police hotute sawi danin, Chief Secretary thuchhuak anga thu thehdarhtu an hriat chhuah tawhte chu - Siaha khuaa kum 19 mi, St. Dominic College, Shillong-a B.A zir mek te, St. Dominic College-a zirlai dang kum 19 mi te, Siaha ECM Venga mi kum 19 mi, Chennai-a awm mek leh, Siaha khaw mi tho mi dang pakhatte an ni.

Zawhna chhangin LH Shanliana chuan, Mizoramin inter state leh international boundary a neih 48 zinga paruk tih loh chu khâr vek an nih thu a sawi a, "Ramri khârna hmunahte hian mamawh ang tâwk tur police duty tur dah vek a ni tawh," a ti.