Assam-in Buarchep ramah kawng an sial : Metre 100 velin Buarchep tlang an la thleng lo

Assam lam chuan Phainuam, Buarchep phaia lirthei luh theiha kawng siam ngei tumin hma an la mek a, lei dawh an tumna hmasa zawkah dawh thei lo mah se, tláng lamah hma an la mek. Tun dinhmunah Buarchep tlang chu metre 100 vêlin an la lai thleng lo.

Phainuam aṭanga Vanglaini thu dawn danin, Buarchep chhuah lamah tlang pahnih a awm a, pakhat zawk chu Buarchep tláng tih niin, Mizote'n hmunphiah an chìnna hmun a ni. Tlang pakhat zawk chu Assam lam luah china ngaih a ni thung.

Buarchep chhuah lamah hian luikawr dài kaina atan Assam-in lei an dawh a, la dawh zo lo mah se JCB leh Hitachi-te chuan lui an dái kái thei tawh.

August 26, 2021 khan Phainuam khaw mite chuan Buarchep chhuah lamah JCB thâwm an hria a, thuneitute hrilh an nih hnuah drone hmanga endik a ni. Drone hmanga endik a nih hnuah Assam-in kawng an sial ngei tih finfiah a ni.

Drone hmanga endik a nih tûkah Mizoram police leh Phainuam khawtlang hruaitute chu a hmunah an kal a, JCB leh Hitachi pakhat hmangin lei an lo lai mek. Mizoram police leh khawtlang hruaitute an hmuh veleh hna thawktute chu an tlanchhia a ni. Police leh khawtlang hruaitute chuan police duty-na hmun tur an sa nghal a, duty an indah chhunzawm nghal.

Kawng laih hna thawktute hian JCB an tlan­chhiatsan a, a tûkah Assam police-te nen an la. Nimin thleng kha chuan hna an thawh chhunzawm rih lo. Assam hian Buarchep chhuah lam aṭanga kawng sial a, Buarchep phai pawh ngei an tum nia thu dawn a ni.

Assam hian kawng hi engemawchen an lai tawh a, an ram lama awm tlang lawn chhuak tawhin, Mizoram chinah pawh engemawchen kawng hi an lai tlang tawh.

Tarlan tawh ṭhin angin, Assam police-te hian Buarchep phaia Mizote thlai tichhiain police an indah a, phai leh phai inkara lui kal kaina atan lei dawh an tum a ni. Mahse, lei dawh hi Mizoram lamin remti loin, a bul hnaiah police an dah ve nghal.

Assam hian phai lama lei dawh an tum pawh hi an la ṭhulh loa, an police-te awmna lamah hna la thawk rengin, Mizoram police-te awmna lamah erawh hna an thawk ngai lo. Phai lamah hian lei an dawh lawk thei lo a nih pawhin, Buarchep chhuah lam tlang aṭangin phai thlenga lirthei luh theih tir vat an tum nia rin a ni.