Tuikawng siam dan tur sawiho a ni

Ports, Shipping and Waterways minister Sarbananda Sonawal hoin August 27, Zirtawpni khan Guwahati-ah hmarchhak biala tuikawng siam leh hman ṭangkai dan tur sawihona, 'Conference of Ministers of NE States for Promotion of Inland Waterways/Shipping related activities in NE Region' neih a ni a, Transport minister TJ Lalnuntluanga a tel.

India hmarchhak biala Inland Water Transport (IWT) kalpui dan tur te, sumdawnna leh tourism-a hmasawnna a thlen turte sawiho a ni. TJ Lalnuntluanga chuan, IWT hmasawnna tura Mizoram sorkar hmalakna leh mamawh te, Khawthlangtuipui, Tuichawng, Tlawng leh Chhimtuipui (Darzo aṭanga Lomasu)-te chu hman ṭangkai vat a nih theihna turin rawtna a thlen.

Minister TJ Lalnuntluanga chuan Tuivai, Tuivawl, Serlui leh Tuirialte chu hman ṭangkai a nih theih leh theih loh enfiah hmasa turin a thlen bawk.

Mizoram Transport Minister hi Commerce & Industries secretary Esther Lalruatkimi leh Transport secretary KT Beicho ten an ṭawiawm a ni.