Kolasib-ah Khelo India Football Centre hawng

Minister of state K Lalrinliana, Kolasib bialtu MLA leh Sports & Youth Services minister Robert Romawia Royte te chuan August 28, Inrinni khan Kolasib Saidan khelmuala phûl lem phah leh Khelo India Football Centre an hawng.

K Lalrinliana chuan, Mizoram sorkarin infiamna tihhmasawnna turin nasa takin hma a la tih sawiin, "Ṭhalai tam zawkin hmasawnna leh hlawhtlinna nasa zawk an chan phah ngei ka beisei," a ti a; khelmual thar leh Khelo India Football Centre-te chuan Kolasib district mipui tan infiamna kawngah malsawmna nasa zawk a thlen a beisei thu a sawi.

SYS minister Robert Romawia Royte chuan, "Kolasib District Khelo India Football Centre hi Mizorama FIFA pawmpui football field hmasa ber a ni," a ti a; infiammite tih hmasawnna hmanraw ṭangkai ni tura hman a nih theih nan duhsakna a hlan.

Khelo India Football Centre, Kolasib hi Khelo India Scheme hnuaiah cheng nuai 500 sênga buaipui a ni a, MANIDCO hnuaia Decor India-in an siam a ni.

Hawnna inkhawmah hian MLA pahnih Dr K Pachhunga leh H Lalzirliana bakah, Sports & Youth Services director Lalsangliana, Olympian Lalremsiami Hmar leh sorkar hotute an tel.