ASF vangin vawk 25,256 thi tawh

Vawk pùl hri, African Swine Fever (ASF) avangin nimin thleng khan Mizoramah vawk 25,256 a thi tawh a, vawk 9,458 suat (culled) a ni tawh. Mizorama khua/veng 235-ah ASF a léng tih finfiah a ni tawh bawk.

Animal Husbandry & Veterinary department-in report an dawn chinah, ASF vangin Mizoramah vawk 25,256 a thih tawh laiin, ASF lènna (infected area)-ah vawk dam lai 45,100 a la awm a; nimin thleng khan ASF infected area-a puan ni lo khua/veng 106-ah chhan hriat loha vawk thi 1,036 a awm tawh.

Aizawl district chu ASF infected area leh ASF vanga vawk thi tamna ber a la ni zel a, Mizoram puma infected area zinga 45.53% chu Aizawl district-a mi a nih bakah, nimin thlenga Mizorama ASF vanga vawk thi zawng zawng zinga 42.62% chu Aizawl district-a mi a ni.

AH&Vety hriatpuinain ASF infected area 235 zinga 102-ah vawk 9,458 suat a ni tawh a; Mamit district chu ASF vanga vawk suat tamna ber niin, Mamit district-a ASF infected area 29 zinga pariatah nimin thleng khan vawk 2,846 suat a ni tawh. Mizorama ASF infected area ni lo khua/veng 13-ah ASF rinhlelh vangin vawk 307 suat a ni tawh bawk.

Chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin AH&Vety department chuan mipui an ngen a ni.