KHAWTHLIR

Thisen pe
August 28, Inrinni khan ṬKP, Bawngkawn Bial chuan ṬKP Coordination, Aizawl bultumin Aizawl Civil Hospital tan thisen unit 48 an pe a, petute mipa 43 leh hmeichhia panga an ni. Civil Hospital blood bank-ah mimal a thlawna thisen pe mi 13 an awm bawk. KṬP, Bethlehem North Branch pawhin Inrinni khan Synod Hospital tan thisen unit 25 an pe a, petute mipa 22 leh hmeichhia pathum an ni a; 06 Bikers, Serchhipte'n Serchhip District Hospital-ah thisen unit 12 an pe bawk a ni.

Freedom Run
August 28, Inrinni khan Siahaah Fit India Freedom Run huaihawt a ni a, MADC sorkara executive member (Sports) Beirahmô Syhly-in a vailiam. He hunah hian Covid-19 léng avanga mipui punkhawm a rem loh avangin ṭhian ho leh chhungkua angin an tlân a ni.

Leiminin in hnâwl
August 27, 2021 zan khan ruahsur avanga leiminin Bawngkawna Rengliana in chu a hnâwl a, bungrua chuh hman an nei lo. Leiminna hmun hi bialtu MLA Vanlalhlana chuan August 28, Inrinni khan a tlawh a, in senghawi hnatlangte ei leh in senso atan pawisa a pe a ni.

Khawzawlah Covid-19 No Tolerence Week
Covid-19 darh zel tur vèn nan Khawzawl DC CC Lalchhuangkima chuan Khawzawl khawpuiah August 28 aṭanga September 4, 2021 chhung Covid-19 No Tolerence Week a puang. No Tolerence Week chhung hian zonal officer, police leh executive duty-te'n an bial chhung ṭheuh ngun lehzualin an fang dawn a; dan zâwm lote chu hrem an ni ang.

Meizial man
Serchhipa hmunpui nei Assam Rifles leh Champhaia Customs department mite chuan August 28, Inrinni khan Mualkawi leh Hruaikawn inkar kawngah ram dang meizial báwmpui 100 leh báwm mal 45 an man a, a neitua puh mi pakhat an man bawk. Meizial an man hi Customs Preventive Force, Champhai hnenah hlan a ni a, Rs. 1,31,17,000 hùa chhût a ni.