Covid-19 MR bill 253 ziak lut tawh

August 24, 2021 thleng khan Covid-19 vei Mizoram State Health Care Society (MSHCS) hnuaia inziak lut zingah an inenkawlna senso hmu lêt tura dilna, medical re-imbursement bill thehluh tawh leh ziah luh tawh 253 an awm.

MSHCS principal chief executive officer Dr Chawngthanchhunga chuan May 19, 2021 khan hriattirna a tichhuak a; sorkar pawmpui damdawi-in, dedicated covid health centre (DCHC), covid care centre (CCC) leh community covid care centre (CCCC)-a Covid-19 vei enkawl, MSHCS-a in ziak lutte tan an inenkawlna senso bakah, ei leh in man an hmuh let (bill) theih thu a tarlang a ni.

MSHCS aṭanga Vanglaini thu dawn danin, May 19, 2021 aṭanga August 24, 2021 thleng khan Covid-19 vei zingah inenkawlna bill MSHCS-a thehluh tawh leh ziah luh fel tawh mi 253 an awm a; bill thehluh tawh, la ziah luh hman loh eng emaw zat a awm bawk.

Medical re-imbursement bill ziah luh tawh 253-te sum hmuh lêt tur (bill amount) belhkhawm chu Rs. 28,06,114 a ni a; mi eng emaw zat chu pek tawh an nih thu MSHCS hotute chuan an sawi.