Minister-in sorkar hmalakna enfiah

Minister of state Robert Romawia Royte chuan August 27-28 chhung khan a bial, Aizawl East-II huam chhunga sorkar hmalakna kal mekte a enfiah a, hmun hrang hrangah ṭanpuina a pe.

Robert Romawia Royte chuan, Armed Venga field chhawng sak mek chu Covid-19 léng karah tluang taka sak chhunzawm zel a ni tih sawiin, lawmawm a tih thu a sawi a, "UDPA hmalaknaa Armed Veng chung lam leh hnuai lam inpawhna tur luikawr chunga lei pawh tender tawh a ni a, thawh ṭan thuai a ni ang," a ti.

Chite Veng field-ah phûl lem phah a nih tur thu te, Armed Veng South hall tihlenna tur project sorkar laipuiah thehluh a nih tawh thu leh, futsal ground siam tum a nih thute a sawi bawk.

Robert Romawia hian MLA fund aṭangin Armed Veng Branch MHIP building sak zawm nan Rs. 3,00,000, Armed Veng LTF ṭanpui nan Rs. 20,000, Chite Veng MHIP hnenah Rs. 2,00,000 leh a mimal sum aṭangin Mizoram Police Wives Welfare Association hnenah mirethei tana an rawngbawlna puih nan Rs. 50,000 a pe. Armed Veng South leh Chite Veng chhunga khawsak harsate tan MLA fund kaltlangin inhlawhna siam a tum thu a sawi bawk a ni.