Airport atana survey neih mekna New Laty-a hmalak dan enfiah

Siaha bialtu MLA Dr K Beichhua, minister of state chuan nimin khan New Laty (New Latawh) khaw rama airport siam theih a nih dawn leh dawn loh zir chianga Mizoram PWD-in survey an neih mekna hmun chu tlawhin, an hmalak dan a enfiah.

Dr K Beichhua chuan, kum 2015 khan New Laty-a airport siam tura rawtna khatih laia chief minister Lal Thanhawla hnenah an thlen tawh tih a sawi a, "Kum 2016 khan aerial survey leh preliminary survey neih tawh a ni a, tunah hian PWD chuan final survey a kalpui mek a ni," a ti.

Ram tana thil ṭha tih kawngah party thliar loin mipui an ṭan rual a pawimawh thu sawiin K Beichhua chuan, "New Laty khawtlang mipui chu sorkar hma­lak­­na an ṭawiawm ṭha 

ṭhin hi a lawmawm hle," a ti a; mipuite chu zang­nadawmna lak inchuha buai lo tur leh zangnadawmna beisei loa ram tan phal taka an ramte hlân turin a ngen a ni.

Ram enfiahtute zinga mi Lalthan­zuala, PWD executive engineer chuan, khawchhiat vangin final survey an neih chak theih loh thu a sawi a, "Airport atana siam tlak a nih ngei kan beisei," a ti.