ZLP-te'n an ṭhianpa sûlhnu an fang

ZPM Legislature Party (ZLP)-te chuan an member, Tuirial bialtu MLA Andrew H Thangliana'n chatuan ram a pan tâk avangin August 28, Inrinni khan Tuirial bial an tlawh a, khaw hrang hrangah sûnna hun an hmang. MLA-te hi ZPM councillor-te'n an ṭawiawm a ni.

ZLP secretary Dr Van­lal­thlana chuan, ram rawng an bàwlpui, an ṭhianpa an chán chu hrilhhai thlak an tih tak zet thu sawiin, "Hna thawh zawh loh leh hmabak tam tak nei chunga min kalsan mai hi kan tuar tak zet. Bial chhung mipui pawh kan tawrhpui tak zet che u a ni," a ti.

Tuirial bial mipuite chu an bialtu MLA a awm tâk loh avanga thlaphâng lo tura chahin Dr Vanlalthlana chuan, "Keini, a thawhpui MLA-te hi he bial tan hian kan ding zel dawn a, a bial tana tih theih kan neih ang angte kan ti zel ang," a ti a, harsatna an neih chuan an hnena thlen hreh lo turin a chah.

MLA-te leh councillor-te hi khaw hrang hrangah ZPM party hruaitute'n an lo dawngsawng a, inkawmhona hun an hman bakah, hripui veite enkawlna CCCC-te tlawhin ṭanpuina an pe a ni.

ZPM party chuan thuchhuah siamin, "Pu Andrew-a hian a bial chhung leh Mizoram tana a beisei leh a duh angte a tihpuitlin hman loh, hmachhawp tam tak nei chungin mual min liamsan a, a sûlhnute chhui a, a hmachhawpte tihlawhtling turin ZPM chuan theihtawp a chhuah dawn a ni," an ti.