Covid-19 vangin mi 212 an thi tawh

August 28, Inrinni khan Covid-19 vei enkawl lai mi panga an thi a, nimin khan mi pakhat a thi leh bawk. Sorkar chhinchhiah angin, nimin tlai dar 5 thleng khan Covid-19 vangin Mizoramah mi 212 an thi tawh a, August thla bikah mi 64 an thi tawh.

Rosnoti (49), Tuidangtlang, Lawngtlai district chu August 28, Inrinni chawhma dar 10:50 khan a thi a, a thih hnuah Rapid Antigen test hmanga swab sample endik niin, Covid-19 vei a ni tih finfiah a ni. Lawngtlai aṭanga thu dawn danin, Rosnoti hi a dam loh avangin Lawngtlai District Hospital panpui a ni a, damdawi-in thlenpui a nih hnu lawkah risk ward-a a awm laiin a thi a, ward-ah dah luh a ni hman lo.

Inrinni chhun dar 11:35 khan Moin Uddin (72) h/o Lovely Begam, Mission Veng chu Aizawl City Hospital-ah a thi a, a thih hnuah RAT hmanga endik niin, Covid-19 positive a ni tih hmuh a ni. Amah hi Karimganj lam mi, hun rei tak Mission Venga awm tawh a ni. Ni li kal ta vel aṭangin a insawisel ṭan a, Inrinni chhun dar 11 vel khan City Hospital panpui niin, damdawi-in an thlen hnu lawkah a thi. Moin Uddin hi Kristian a ni a, Mission Veng biak-in parking-ah vui niin, Mission Veng thlanmuala phûm a ni.

Lalṭanpuii (48), Vairengte IOC Veng chu August 28 chawhnu dar 2:40 khan Covid-19 vangin State Referral Hospital (ZMC)-ah a thi a, nimin khan vui a ni. Covid-19 vei a ni tih August 6, 2021 khan hmuh chhuah a ni a, SRH-ah enkawl nghal a ni tih sorkar thuchhuakin a tarlang.

Inrinni tlai dar 4:45 khan Sangchhungi (87) w/o Sangkhuma (L), Ramhlun Vengthar chu hripui vangin SRH-ZMC-ah a thi a, Inrinni zan khan vui a ni. Covid-19 positive a ni tih August 25 khan hmuh chhuah niin, SRH-ah dah luh nghal a ni a; hripui a vei tih hmuh a nih aṭanga ni thumnaah a thi a ni.

August 28 vek tlai dar 6 khan Bangla (63), Chuhvel, Mamit district chu Covid-19 vangin Mamit District Hospital (dedicated covid health centre)-ah a thi. Covid-19 vei a ni tih August 22 khan hmuh chhuah a ni a, August 23 khan Mamit DCHC-ah dah luh a ni tih sorkar thuchhuakin a tarlang.

Nimin zing dar 4:10 khan C Lalrinawma (40) h/o C Lalduhawmi, Bethlehem Vengthlang chu hripui vangin SRH-ah a thi a, Covid-19 vanga Mizorama thi 212-na niin, nimin khan YMA Hall-ah vui a ni. Covid-19 positive a ni tih August 13-ah hmuh chhuah a ni a, August 16 aṭangin SRH-ah enkawl a ni.