KHAWTHLIR

ZPM-in tlawh
ZPM Ṭangrual Pawl hruaitute chuan nimin khan an chairman Lalliansawta hoin Zophaia Assam Police-te kuttuar mi pathum Aizawl Civil Hospital-a enkawl mek Lalneihkima, Lalro­chhara leh Ricky Lal­chhandamate chu an tlawh a, tawrhpuina atan Rs. 1000 ṭheuh an pe.

Assembly Session
Mizoram Assembly Budget Session chu vawiin chawhma dar 10:30 aṭang hian Assembly House-ah ṭan a ni dawn. Vawiin hian House-ah Larsap-in thu a sawi dawn a, kum 2018-2019 chhunga Mizoram budget tur chu March 15 ah pharh tur niin, session hi March 29 ah zawh tum a ni.

Aizawl DC-in Punkhawm khap
Aizawl DC chuan thupek chhuahin, Chief Minister office leh a bangla panna kawng, McDonald Hill leh a chhehvel, Zarkawt traffic point aṭanga Hrangbana College inkarah mi panga aia tam pun khawm a khap a, lungawiloh lantir a kal khawm leh hunger strike adt. a khap bawk. Thupek hian March10, 2018 aṭang thla 2 chhung a huam ang a, boruak muanawm a awm hunah tih danglam theih a ni ang.

MNWF-in dem
Mizo National Women Front chuan thuchhuah siamin, March 10, Inrinnia Bairabi Zophaia MZP leh Assam Police innawr buainaah Mizo journalist hmeichhe pahnih - Catherine C Sangi, All India Radio correspondent leh Emmy Lawbei, News 18 Channel reporter-te kutthlak an ni chu an dem tak zet thu an tarlang a, "Kan hmeichhiatpui kuttuarte hi zangnadawmna sorkarin pe ngei turin kan phût a ni," an ti.

Heroin man
Central YMA hnuaia SRS-te chuan March 11, Pathianni khan heroin hawng 4, can 4 leh chhinsen 3 an man a, a hlut zawng chu Rs. 1,85,000 a ni.