KHAWTHLIR

GoAir chuan Coronavirus hri lêng vangin Lengpui Airport-a an service tihtawp lailawk an tum chu an sût a, mipui ngenna avangin Kolkata-Aizawl, Aizawl-Guwahati, Guwahati-Aizawl leh Aizawl-Kolkata inkarahte a hmaa an thlawh dan pang­ngaiin thlawh­theihna an thlawhtir chhunzawm zel dawn tih an puang. Service titawp rih tur anga hriattirna an lo tihchhuahin mi tam tak rilru a tibuai chu pawi an tih thu an tarlang.

MBSE chuan hriattirna tichhuakin, HSSLC 2020 Examination neih mekah hmai tuamna (mask) leh kut silna (hand sanitiser)-te exam hall-ah ken luh phal a nih thu an tarlang.

MPC party leh PRISM party hruaitute chu nimin khan MPC President pisaah an ṭhukhawm a, an party pahnihte party pakhata inchhûnfin tuma hmalaknate an thlirho. Party pakhata infin turin a hmáwr bâwk thuai an tum thu an tarlang.

Mizoram Baptist Koh­hran chuan ram hrang hranga Coronavirus hri léng chungchanga thu­chhuah an lo siam tawh chu tidanglamin, nimin khan thuchhuah thar an siam a, "Pathian biak inkhawm leh fellowship neih leh neih loh chung­changah, kan awmna leh kohhran dinhmun a inan loh avangin tual­chhung kohhran committee kutah dah a ni," an ti. Programme dangte chu buatsaih rih lo turin kohhrante an ngen nghal a ni.

Aizawl DC pisa dawr turte chu a luhna pui ber (main gate) aṭang chauha luh tur a ni a, luh hmain gate bula kut silnaah kut sil hmasak vek tura hriattir an ni. Sorkar pisa eng emaw zat chuan luhna bulah kut silna hmanrua dahin, office chhunga lut turte chu kut sil hmasa zel turin an ti bawk.

Aizawl Bawrhsap chuan, Coronavirus laka inven nan DC pisaa Aadhaar enrollment kalpui mek chu tiam chin awm loa tihtawp lailâwk a nih thu a puang.