Kum 2018 aiin 1994 inremna pawimawh zawk : Sinlung Hills Accord Implementation Demand Committee

Sinlung Hills Accord Implementation Demand Committee (SHAIDC) hruaitute chuan nimin khan Aizawl Press Club-ah thuthar thehdarhtute an kâwm a; kum 2018-a sorkar leh HPC(D) inremna aiin kum 1994-a sorkar leh HPC inremna an ngai pawimawh zawk tura an ngaih thu an sawi.

SHAIDC general secretary Lalparkunga chuan, Mizoram sorkar leh Hmar People's Convention - Democratic (HPC-D) ten April 2, 2018-a inremna an ziahah, chu inremna chuan kum 1994-a Mizoram sorkar leh HPC inremna thuthlung a luahlân (supersede) ang tia ziah a nih thu a sawi a, "Sinlung Hills Development Council (SHDC) kha Sinlung Hills Council (SHC)-in supersede mah se, 1994 Accord chu a supersede lo a ni tih court thutluknaah a chiang a ni," a ti.

SHAIDC hruaitute sawi danin, kum 1994-a Mizoram sorkar leh HPC inremna thuthlung tihpuitlin a nih loh avangin SHAIDC-in May 25, 2016-ah Gauhati High Court, Aizawl Bench-ah petition an thehlut a, September 4, 2017-ah Court-in sorkar leh HPC inremna Memorandum of Settlement (MoS) para 5.1 leh 5.3-te tipuitling turin order a chhuah a ni.

Court order angin Mizoram sorkarin a tih tur a tihpuitlin loh avangin October 9, 2018-ah Contempt of Court order chhuah a ni a, Mizoram sorkar chu Court thuchhuak hmasa kum khat chhunga tipuitling tura hriattir a ni. Chu pawh chu state sorkarin a tihpuitlin loh avangin Feb­ruary 21, 2020-ah Guahati High Court chuan Mizoram sorkar chu chawlhkar li chhunga tipuitling tura a intiamna anga thil a tih ngei thu affidavit siama thehlut turin a hriattir leh bawk.

SHAIDC hruaitute chuan, "Tun hma ang bawka chhuanlam fahrah tê tê hmanga sorkarin a tih tur a ti lo a nih chuan a ṭul chen chen kan kal zel mai dawn a ni," an ti.