Bank-ah digital system uar turin chah
Mizorama bank zinga branch ngah ber pahnih - State Bank of India (SBI) leh Mizoram Rural Bank (MRB)-te chuan Coronavirus chungchangah mipui ngenna an tichhuak a; bank-a kal kher loa digital system-te hmang uar turin an chah.
SBI chuan, hri lêng laka Mizoram mipui an him theih nan digital system-te hman uar a ṭul thu sawiin, "Mobile banking, YONO, YONO Lite, YONO cash leh internet banking-te hmanga mahni in aṭanga banking transaction ti tam turin kan inngen a, hei hian natna inkai darh laka inven lâwknaah nasa taka min puih kan beisei," an ti.
Digital system hman kawnga harsatna nei tan helpline siam a ni a; helpline number-te chu - 8787757985, 7005618668, 9863363599, 9774751352, 9436334372, 7627997717 leh 8974065761-te a ni. SBI chuan ATM hman kawngah pawh fimkhur tura mipui ngenin, "ATM hman hma leh hman hnuah hand sanitiser-a kut silfai turin kan inngen. Ṭul takah lo chuan ATM hman rih loh mai ni se kan duh bawk," an ti a; sumdawngte chu QR code nei vek tur leh mipui pawh UPI hmanga QR code scan a, thil lei man pe turin an ngen bawk.
MRB pawhin anmahni dawrtute chu mobile banking hmang uar turin an chah a; Google Play / Apps Store-ahte software/application 'Mizobank Mobile Banking' tih download tur a awm tih sawiin, "Hei bakah hian ATM card payment / UPI payment (BHIM, GooglePay, PhonePe, Paytm, etc.) hman theih a ni a, hmang uar turin mipui kan ngen a ni," an ti. MRB hian mobile banking chungchanga harsatna neite tan helpline an siam a; helpline number-te chu - 9436195390, 9436146373, 8974028099 leh 8837049212-te a ni.