Tourism dept-in target an khûm tawh Hri léngin tourism hnathawh a tikhaihlak
Mizoram Tourism department chuan 2019-20 sorkar kum kal mekah January 2020 thleng khan sum hmuh tura an target cheng nuai 254.49 chu a hmu tling tawh a, nuai 23.41-in an khûm tawh. Khawvel ram hrang hranga Coronavirus léngin khualzin chungchanga an hnathawh a tihkhaihlak thu an sawi.
Tourism department hotute sawi danin, Mizoramah Coronavirus a luh loh nana sorkar hmalaknaah, Mizorama international boundary khâr leh ram dang mi Mizorama luh khap rih a nih avangin, Mizorama tourist operator-te hna a khaihlak a; hriat theih chinah ram dang mi khualzin 26 (United Kingdom) leh ram chhung mi khualzin (domestic tourist) 50-100 velin an rawn zin tur an ṭhulh tawh a ni.
Kum 2009 aṭanga kumin January thleng khan Mizoram páwn mi khualzin 8,12,610-in Mizoram an rawn tlawh. Tourism department hotute chuan, tourist transport provider-te hmasawnna turin hmalakna neih a tum mek a, taxi leh city bus tan 'Driver smart driving' pawh a taka kalpui turin sawiho mek a nih thu an sawi.