Mizoramah kum 10 chhungin Khualzin 6,79,068 an rawn lut : Hripui vangin khualzin rawn lut zat a tlahniam nasa

Tourism department chhinchhiah danin, kum 10 chhungin India ram chhung leh ram páwn aṭangin mi 6,79,068-in Mizoram an tlawh tawh a, hotel neitute leh thingtlang mite'n kum khatah cheng nuai 310 vel an la lut ṭhin. Covid-19 lèn hnuah erawh nasa takin Mizorama lut zat a tlahniam. Tourism minister Robert Romawia Royte chuan, Tourism project hrang hrang an siamah cheng vbc. 1,100 hmuh theih an beisei tih a sawi.

Vanglaini palai zawhna chhanga Tourism department hotute'n khualzin an chhinchhiah zat an sawi dan chuan, kum 10 chhungin state pawn aṭanga khualzin rawn lut 6,79,068 zinga mi 6,69,707 chu India ram chhung aṭangin a ni a, ram pawn aṭanga rawn zin mi 9,361 chiah an awm.

India ram chhung leh páwn aṭanga Mizoram tlawhtu zat hi a pung ve hret hret a, mahse, Covid-19 lèn hnuah erawh chuan nasa takin a tlahniam a; Aizawla private hotel leh thingtlang lama mite'n khualzinte aṭanga an sum lak luh pawh nasa takin a tlahniam a ni.

Tourism department hotute chuan, Mizorama rawn zinte chhinchhiah turin Mizoram police-a CID chhinchhiah te, hotel leh tourist lodge vela mikhual thlen zatte aṭangin data an lak khawm ṭhin thu an sawi.

Department-in tourist tia an chhiar dan chuan, khualpáng zin (tourism)-a rawn zinte leh hna pawimawh thila rawn zinte pawh Mizoram hmun hrang hrang an tlawh kual nghal ṭhin avangin an chhiar vek tih sawiin Tourism hotute chuan, "Mizorama rawn lutte hi darkar 24 chhung Mizorama chámte kan chhiar ṭhin," an ti. Chutih laiin, hnathawk tur leh eizawnna avanga rawn kalte chu an dinhmun azirin an chhiar vek thu leh, hripui lèn hmaa nunphung a pangngai lai pawhin Mizoramin tourist a la ngah tâwk loa an ngaih thu an sawi bawk.

Tourism department hotute sawi danin, Mizoramah hotel 72 a awm a; chu'ng zingah chuan home stay 12, Tourism department-in suma an ṭanpui 32, tour operator pariat leh travel agency 41 an awm mek. Hotel-te hian mikhual an thlen kaihhnawihah kum khatah cheng nuai 310 vel an khawih che ṭhin a, chu'ngte chu Aizawla hotel-te a ni tlangpui.

Tourism department hian khualzinte aṭanga Mizoramin sum a lak luh zat turah kum tin target an siam a, kum 2014-15 aṭang khan kum 2019-20 thleng khan kum tin target khûm a ni zel a, kum 2018-19 ah phei chuan cheng nuai 58.61-in khûm a ni. Covid-19 lèn hnuah erawh target an pha lo hle a, kum 2020-21 khan an target chu cheng nuai 309.61-in an pha lo a, kum kal mek 2021-22 ah pawh nuai 283.16-in target an la pha lo.

Vanglaini zawhna chhangin Tourism minister Robert Romawia chuan, khualzin tam zawk hîp lut turin Tourism department-in theihtawpin ṭan an la mek tih sawiin, "Tourism hmasawnna atana infrastructure ngaite nei turin project lian tak tak kan siam a, a ṭhen sanction tawh niin, a ṭhen sanction mai tura buaipui mek a ni. Project hrang hrang cheng vbc. 1,100 hû kan beisei mek a, a hlawhtlin hunah chuan danglamna lian tak a thleng ang," a ti.

Robert Romawia chuan, "Covid-19 hripui vanga thil tih theih a nih loh lai pawhin ziak lamah ṭan kan la a, Mizoram Responsible Tourism Policy, 2020 siam tharin, hemi hnuaiah hian dan leh dun siam ngai pawh kan siam a ni," a ti bawk. Tourism department hotute sawi danin, khualzin híp turin tun hnai aṭangin hmalakna thar an nei nual a; The Mizoram Registration of Tourist Trade Act, 2020 behchhanin dan (act, rules leh guidelines) 11 an siam tawh.

Department a din hnua a vawi khat nan tour guide training buatsaihna turin North Eastern Council aṭangin sum an hmu a, mi 110-in training nei tawhin, mi 83 an zo a, tunah hian certified state tour guide mi 83 an nei mek.

Mizoram Responsible Tourism Policy, 2020 zûlzuiin pilot project atan Khamrâng leh Ailawng ramah responsible tourism initiative bul ṭan tum a ni. Mizo pangpar hmanga khualzin hîp dan tur ruahman mek a ni a, Zamzo Kût siam tum a nih bakah, nghah loh dawr, Mizo kut chhuakte leh thildangte chawi lâr an tum mek bawk.
Kum 2020 khan Tourism department enkawl tourist lodge 24 chu quarantine centre atan a thlâwnin an hmantir a, kuminah erawh chuan man chawiin an hmantir thung.