Statistical Handbook 2020 tlangzarh : GSDP-ah industry sector-in hma a sawn

Economics & Statistics-in Mizoram Statistical Handbook 2020 an buatsaih chu nimin khan director B Lalrinhlua’n an pisa conference hall-ah a tlangzarh.

Statistical Handbook thar bera a lan danin, Mizoram GSDP-ah industry sector-in GSDP-a an thawh zat a pun hret hret laiin, agriculture & allied sector leh service sector-te thawh zat a tlahniam hret hret thung a ni.

B Lalrinhlua chuan, "Mizoram Statistical Handbook hi Mizoram sorkar department hrang hrangte'n ram hmasawnna tura hma an lakna leh dinhmun te, Mizoram sik leh sá, zirna, hriselna, sum leh paia Mizoram dinhmun leh thil tam tak tarlanna a nih avangin a pawimawh hle a ni," a ti a; research titu te, plan leh policy siamtute leh tourist-te'n an hman ṭangkai ṭhin thu a sawi.

Mizoram Statistical Handbook hi kum khat danah tihchhuah a ni ṭhin a, tun ṭuma tlangzarh hi tihchhuah hmasak ber aṭanga 23-na a ni. Statistics hi sorkar department, pawl, kohhran leh institution hrang hrang aṭanga lak khawm a ni.

Mizoram Statistical Handbook 2020-a tarlan danin, GSDP-a sector chi thum - agriculture leh a kaihhnawih (allied), industry leh service sector zingah kum 2014-15 aṭang khan industry sector-in GSDP-a an thawh zat a pung hret hret a, agriculture & allied sector leh service sector-te thawh zat a tlahniam hret hret thung.

Industry sector-in kum 2014-15 chhunga GSDP-a a thawh zat chu 20.87% a nih laiin, kum 2019-20 (projected)-ah chuan 30.64% a tling tawh a; chutih laiin, agriculture & allied sector-in kum 2014-15 chhungin 31.49% an thawh laiin, kum 2019-20 (projected)-ah chuan 26.08%-ah a tlahniam a , kum 2018-19 (provisional)-ah phei chuan 25.27% chiah a tling.

Service sector-in GSDP-a a thawh zat pawh a tlahniam a; kum 2014-15 chhungin 47.63% a nih laiin, kum 2019-20 (projected)-ah chuan 43.28% a ni.