Tuilian vangin mi 200 vel thiar chhuak

Chawlhkar liam ta chhung khan Mizoram khawthlang lamah ruah a súr nasa a, hei vang hian Khawthlangtuipui a lian a, a chîm chin a san belh zel. Khaw ṭhenkhatah khaw chhunga inkalpawhna kawng leh tuipui kama huan eng emaw zat a chîm mek a, mi 200 vel hmun him lamah thiar chhuah an ni tawh.

Tlabung aṭanga thu dawn danin, Khawthlangtuipui kama awm, hmun hniam zual lai Malsury khuaah chuan chhungkaw ṭhenkhat awmna hmun chu tui lianin a hual a, 131 Bn. BSF-te'n chhanchhuah hna thawkin, chhungkaw eng emaw zat chu hmun him lamah an thiar chhuak. Tuilian kaihhnawiha harsatna dang thleng a awm leh awm loh thlithlaiin meilawngin hmun hrang hrang an fang bawk.

131 BSF commandant Col. KS Nautiyal chuan, Khawthlangtuipui lian vanga hmun him lama an thiar chhuahte chu mi 200 vel an nih thu a sawi a; tuilian vanga ei leh in chungchanga harsatna tâwk an awm chuan theihtawp chhuahin chhawmdawl an tum thu a sawi bawk.

Tlabung Post editor Vanlal­hriatpuia Khiangte chuan, tun dinhmunah Khawthlangtuipui lianin mihring chenna in a chim an la hre lo a, mahse, tuipui kama thlai chìnna nùl eng emaw zat a chîm bakah, lui a len belh zel avangin khaw ṭhenkhata chenna in eng emaw zat chu tui chîm hlauhthawnawmah a awm mek thu a sawi.