Tawnluia'n Serchhip Sports Stadium a hawng

Deputy chief minister Tawnluia chuan nimin khan internet kaltlangin Serchhip Sports Stadium a hawng.

Tawnluia chuan, stadium chu mipui ta a nih thu leh enkawl leh hman danah neitu thinlung put a ngaih thu sawiin, "Ṭhalaite'n state, national leh international thleng pawha infiamnaa hming an chher theih nan an hman ṭangkai ka beisei," a ti a; Mizo ṭhalaite infiamna chi hrang hranga hma an sawn theihna turin Mizoram sorkarin hma a lak thu a sawi.

Mizoram sorkarin Sports Policy te, infiammite lawmman tihpun leh infiamnaa mi hlawhtlingte tana sorkar hna 5% a hauhsak tawh thute sawiin Tawnluia chuan, "UDPA department-in a kenkawh Smart City project hnuaiah khawpuia khelmual eng emaw zat tihchangtlun te, indoor stadium leh futsal ground siam belhte chu Sports deparment hotute nen ngaihtuahho a ni a, hmachhawp pawimawh tak zingah dah tel a ni," a ti.

Sports minister Robert Romawia Royte chuan, UDPA leh Sports department thawhhona a ṭhat thu sawiin, "Sports department tana tih theih loh thil tam tak tihsakin, Mizoram ṭhalai infiamna lama tui mite tan change a thleng mek a ni," a ti a; mumal leh ṭha taka enkawl a nih theih nan theihtawp an chhuah tur thu a sawi.

Serchhip Sports Stadium hi sorkar laipui aṭanga sum hmuh vbc. 15.25 hmanga siam a ni a, synthetic athletic track phahna senso atan Mizoram sorkar aṭangin cheng vbc 3.30 hmuh a ni bawk. Mipui 5,000 vel ṭhut theihna tur gallery siam tel a ni.

Stadium hawnna inkhawm hi Aijal Club-a neih a ni a, Sports minister hlui Zodintluanga Ralte, MLA pawh a tel. Serchhipah pawh DC mawhphurhna la mektu Lalmuansanga Ralte hoin stadium-ah hun hman a ni.