State Skills Competition hawn a ni

Labour, Em­ploy­ment, Skill Development & Entrepreneurship chuan nimin khan Industrial Training Institute (ITI) Auditorium-ah Skills Competition hawnna an buatsaih a, LESDE secretary Lalramsanga Sailo-in a hawng. He intihsiakna hi World Skills Competition 2022, Shanghai, China-a tel thei tur thlanna a ni.

Lalramsanga Sailo chuan, ram hmasawnna chu ram leilung hausakna leh hmanraw neihah a innghat vek lo a, ram mipui taimâkna, themthiamna leh tumruhnaah a inghat thui hle tih sawiin, "Skills development-ah hian ṭhalai tam zawkin hna an neiha an intodelh theihna tur kawng a awm a, hemi kawngah hian rilru leh taksa zawng zawng nen kan beih a ngai a ni," a ti.

Hawnna inkhawm hi LESDE director K Lalhmingliana'n a kaihruai a, deputy director Lalmuanawma'n Skills Competition chungchang leh kalpui dan a sawifiah.

Skills Competition hi vawiin zing dar 9-ah ṭan tur a ni a, trade chi 12 hmangin inelna neih a ni dawn a, tel turin mi 59 an inziak lut. Trade tin aṭanga a ti ṭha pahnih thlan a ni ang a, chu'ng mite chuan Regional Skills Competition-ah Mizoram aiawhin an tel dawn a, Regional Competition an paltlang chuan national level-a intihsiaknaah an tel ang a, chumi an paltlang leh chuan India aiawhin World Skills Competition, Shanghai-ah an tel dawn a ni.