Mizoramin Covid-19 vangin Lottery a kalpui thei rih lo

Mizoram sorkar chuan sum a lâk luhna hnâr lian zinga mi Mizoram State Lottery chu Covid-19 léng avangin a kalpui thei rih lo. Hetih lai hian, Mizoram State Lottery chungchanga Gauhati High Court-a thubuai awm chu chinfel a ni tawh.

Institutional Finance and State Lottery (IFSL) hotute hnen aṭanga Vanglaini thu dawn danin, Mizoram loterry chungchanga Gauhati High Court-a thubuai a tàwp hnuah lottery chu kalphung thara kalpui a ni. Tender chhuah ṭhat niin, firm pawh thlan ṭhat a ni. Firm-te chuan hun eng emaw chen lottery an kalpui hman a, mahse, Covid-19 laka inven nan inkharkhip puan a nih avangin an kalpui thei tawh rih lo.

Mizoram State Lottery hi state páwnah vek hun eng emaw chen kalpui tawh a ni a, paper lottery chu tihtawp a ni tawh a, online lottery chiah kalpui a ni rih.

MNF party-in sorkarna an siam hnuah lottery kalpui ṭhin dan thlâk tumin hma an la a, June 2019 khan distributor tur thlanna tur tender chhuah a ni. Tender chu chhángtu awm mah se, court-ah thubuai a awm avangin hawn theih a ni lo. Hun eng emaw chen lottery tihtawp lailâwk a nih hnuah a hma anga kalpui leh a ni.

Mizoram sorkar chu ruahmanna a lo siam tawh anga kal phalsak lailâwk turin Supreme Court-in Gauhati High Court a hriattir tih sawiin IFSL hotute chuan, "Hei vang hian December 3, 2019-ah tender hawn a ni a, chhángtu zinga chháng sang firm paruk chu lottery kalpui tura thlan a ni," an ti; Gauhati High Court-a thubuai a tàwp tawh avangin kalphung tharin lottery chu kalpui chhunzawm theih a ni tih an sawi.

Lottery kalpui tura thlan firm pangate chu February 2020-ah chuan lottery ṭan hman vek tura tih an ni a; firm-te chu kum nga atan inremna (agreement) ziahpui niin, agreement chu August 18, 2024-ah a tàwp ang. Agreement ang chuan firm-te'n draw tina an chhûn luh tur zat chu kum tin 5%-in a pung dawn a ni.

Lottery kalpui dan hma­saah chuan, kum khatah sorkarin cheng vbc. 17 vel a hmu ṭhin a, kalphung tharah erawh chuan kum khatah cheng vbc. 62 vel hmuh beisei a ni a; lottery kalpui dan hmasa nena sum hmuh inthlauhna tura chhût chu cheng vbc. 45 vel a tling. Mahse, Covid-19 avangin lottery kalpui mumal theih a nih tak loh avangin sum hmuh beisei ang hmuh a ni dawn ta loa ngaih a ni.