KHAWTHLIR

Thisen pe
Rengtekawn Branch YMA chuan nimin khan Kolasib District Hospital Blood Bank-ah thisen unit 29 an pe a, petute mipa 22 leh hmeichhia pasarih an ni. Mimal a thlawna thisen pe mi pahnih an awm bawk.

Hmeichhia pass thate chawimawi
Beti Bachao Beti Padhao (BBBP) aṭangin nimin khan Siaha DC conference hall-ah kum 2020-2021 chhunga HSSLC-a zirlai hmeichhia pass ṭha zual pasarihte chawimawina hun hman a ni a, Siaha DC Kesavan R-a'n a hmanpui. Zirlai ti ṭhate chu lawmpuina thuchei, BBBP mug leh Rs. 5,000 ṭheuh pek a ni. Vawiin hian HSLC-a ti ṭha hmeichhe zirlai mi 30-te chawimawina hun hman leh a ni ang.

Rawtna thlen theih
Padma award hrang hrang - Padma Vibhushan, Padma Bhushan leh Padma Shri dawng tur rawtna hun hawn mek a ni a, chawimawina dawng tlak rawt tur hriate chuan an awmna district bawrhsap kaltlangin September 6, 2021 aia tlai loah Home department Under Secretary hnenah rawtna (nomination) thehluh theih a ni. Hre chiang duh tan www.padmaawards.gov.in ah en theih a ni.

CM leh AR hotu
Aizawla awm 2nd Assam Rifles commandant Col. Rajesh Kumar Nayak chuan nimin khan chief minister Zoramthanga chu Chief Minister's Office-ah a kâwm a, thil pawimawh chi hrang hrang an sawi dun. Tuna Aizawla Assam Rifles awm mekte hi tun hnaia awm thar an ni.

Bungrua hlân
Aizawl South-II bialtu MLA Lalchhuanthanga chuan a ṭum hnihna atan nimin khan a bial chhunga mistiri pariat hnenah furniture workshop bungrua a sem. Hmanrua semna inkhawm hi Tlangnuama a inah neih a ni. Lalchhuanthanga chuan, ZPM party chu kut hnathawktute pawimawhzia hretu leh ngai pawimawhtu a nih thu sawiin, "Kan lo aupui ṭhin 'Bana kaih' (handholding policy) hi kan ngai pawimawh tak zet a ni," a ti.