COVID-19: Mizoram dinhmun : Hripui vei 440 hmuh belh a ni

August 29, Pathianni khan Mizoramah Covid-19 vei mi 440 hmuh chhuah a ni. Nimin khan hripui vei dam tawh mi 358 chhuahtir an ni a, hripui vangin mi pahnih an thih belh thung.

Covid-19 vei hmuh tharte chu TrueNAT-PCR hmanga hmuh chhuah mi 17 leh Rapid Antigen Test hmanga hmuh chhuah mi 423 an ni a; mipa 192 leh hmeichhia 248 an ni.

ZMC laboratory-ah sam­ple endik a nih loh bakah, TrueNAT leh RAT hmangin dist. ṭhen­­khatah endik a ni lo chungin Mizoram hi hmar­chhak state zingah August 29-a Covid-19 vei hmuh chhuah tamna ber a ni leh a, India ram pum­ah pariatna a ni bawk. Chawlh­kar khat chuang chu a záwnin hmar­chhak biala hripui vei hmuh tam berna a ni tawh.

Hripui vei hmuh thar 440-te chu symptom nei 285 leh nei lo 155 an ni a; tualchhunga kái vek niin, kàina chin hriat loh mi 286 an awm.

IDSP record angin, Mizoramah Covid-19 vei 57,962 hmuh chhuah a ni tawh a, mipa 29,680 leh hmeichhia 28,282 an ni. Nimin tlai dar 5 thleng khan mi 49,597 (85.57%) chhuahtir an ni tawh a, mi 214 (0.37%) thi tawhin, enkawl mek mi 8,151 (14.06%) an awm.

August 29, Pathiannia sample endik dan chu - TrueNAT-PCR hmangin district pali-ah 60 leh RAT hmangin district pariatah 1,888 a ni a, a vaiin sample 1,948 a ni. Sample endik aṭanga hripui vei hmuh chhuah 440 chu 22.59% a ni a, TrueNAT-ah 28.33% leh RAT-ah 22.40% a ni.

District tinah hripui vei hmuh chhuah dan chu - Aizawlah mi 310, Mamitah 74, Kolasib-ah 15, Khawzawlah 14, Siahaah pakua, Champhaiah pariat, Lungleiah paruk leh Lawngtlaiah pali a ni a; Aizawla veng 54 leh khaw dang 27-a mite an ni.

TrueNAT hmanga hmuh chhuah mi 17-te chu symptom nei lo vek an ni a, tualchhung vek niin, kàina chin hriat loh pathum an awm. RAT hmanga hmuh chhuah mi 423-te chu symptom nei 285 leh nei lo 138 an ni a, tualchhunga hri kái vek niin, chu'ng zinga mi 283 chu an kàina chin hriat a ni lo.

Covid-19 vei hmuh chhuah thar 440 zingah naupang kum tling lo 140 vel awmin, chu'ng zinga mi 80 chuang chuan symptom an nei a; nausen kum khat tling lo paruk telin, a zatve in symptom an nei. Kum 60 chung lam mi 30 chuang awmin, an zinga a tam zawkin symptom an nei a, symptom nei zingah a upa ber kum 80 mi pawh a tel.

August thlaa ni 29 chhungin Mizoramah Covid-19 vei mi 19,038 hmuh chhuah a ni tawh a, chawhrualin ni tin mi 656.48 hmuh chhuah an awm ang niin, tun hnaiah a pung chho zel. Mizorama Covid-19 vei hmuh tawh zat 57,962 chu kum 2011 chhiarpui angin, Mizorama mi 1,000 zelah hripui vei mi 53 an awm ang a ni.

Nimin khan tlai dar 5 thlengin hripui laka fihlim tawh mi 358 chhuahtir an ni a; Aizawl district-ah mi 158, Mamit district-ah 95, Lawngtlai district-ah 42, Kolasib district-ah 39, Hnahthial district-ah 15, Champhai district-ah paruk leh Serchhip district-ah mi pathum an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 13,311 hmuh chhuah a ni tawh a, TrueNAT-PCR hmangin 3,351, RAT hmangin 41,255, FIA hmangin 44 leh Guwahati-ah pakhat hmuh chhuah a ni tawh.

IDSP tarlan danin, August 29, 2021 thlengin Mizoramah swab sample 8,50,400 endik a ni tawh a, chu'ng aṭanga Covid-19 vei hmuh tawh zat 57,962 chu 6.81% a ni. Hripui vei hmuh tawh zinga mi 53,632 chu Mizoram chhunga kái chhâwng an ni a, mi 4,330 chu Mizoram páwn aṭanga an rawn luh hnua hmuh chhuah an ni.