Covid-19 vangin mi 2 thih belh

August 29, Pathianni zan khan Covid-19 vei mi pakhat a thi a, nimin khan mi pakhat dang a thi leh bawk. Sorkar chhinchhiah angin, nimin tlai dar 5 thleng khan hripui vangin Mizoramah mi 214 an thi tawh a, August thla bikah mi 66 thi tawhin, thi an tam ber thla a ni.

Covid-19 vei enkawl lai Zoramchhani (71) w/o Ralliana (L), Tuikual South chu August 29, Pathianni zan dar 10 khan hripui vangin State Referral Hospital (ZMC)-ah a thi. Zoramchhani hi natna dang nei sa a ni a, Covid-19 vei a ni tih August 18-ah hmuh chhuah niin, August 19 aṭangin SRH-ZMC-ah enkawl a nih thu sorkar thuchhuakin a tarlang. Pathianni zan khan YMA Jubilee Rûnah lumen a ni a, nimin khan vui a ni.

Lalhliappuii (79) m/o Zabiakthara, Hunthar Veng pawh nimin zing dar 8:20 khan Covid-19 avangin SRH-ZMC-ah a thi a, nimin chawhnu dar 1 khan MHIP Hall-ah vui a ni. Covid-19 vei a ni tih August 29, Pathianni khan hmuh chhuah niin, SRH-ah dah luh nghal a ni a, hripui a vei tih hmuh chhuah a nih tûkah a thi a ni. Hunthar Veng aṭanga thu dawn danin, Lalhliappuii hi stroke nei sa a ni a, Covid-19 vaccine la kim tawh a ni bawk.