Assam police-in Mizoram chanchinbumite Kut an thlak vangin lungawi lohna lantir

Assam police-in Mizoram chanchinbu mite kut an thlak an demzia lantirin, Mizoram Journalist Association (MJA) chuan nimin chhun khan Aizawl leh district khawpui hrang hrangah hun an hmang.

MJA sit-in demonstration hi Aizawlah chuan Vanapa Hall kawtah huaihawt a ni a, MJA member ṭhahnem tak an tel.

MJA president Vanlalrema Vantawl-in thu sawiin, March 8, 2018-a Bairabi Zophaia MZP leh Assam police inepnaah ground report tia kal Aizawl leh Kolasib-a chanchinbumi pathum chu Assam police-te'n kut an thlak a; March 10-a an inep lehnaah chanchinbu mi pangain Assam police-te kut an tawrh leh thu a sawi.

Vanlalrema Vantawl chuan, chanchinbu­mite'n an press card an keng lang chung leh chanchinbumi an nih thu an sawi chunga Assam police-in nasa taka an vua chu an dem thu sawiin, "Hetiang thil hi journalist-te chunga thleng tawh lo turin kan duh a, hliamte leh lirthei leh bungrua an tihchhiatsakah zangnadawmna pe ngei turin kan phût a ni," a ti.

MJA President chuan, "Kan journalist puite hliam kan enin thinlung a khawih a, kan rilru a ná. Hetiang hian Assam police chet dan avangin lungawi lohna kan lantir ta a ni," a ti.

Chanchinbumite tawrhna chu Press Council of India, National Human Rights Commission, Prime Minister, DoNER minister, Assam Chief Minister leh hmun dangahte an thlen mek thu leh a ṭul anga an bawhzui zel tur thu a sawi bawk.

Vanapa Hall kawta MJA sit-in demon­stration-ah hian journalist 120 vel an tel a, Mizo journalist-te chunga Assam police chet dan râwvâ tak leh police-te thupetu Hailakandi District Magistrate/DC Adil Khan laka an lungawi lohna lantirna thuziakte an ken bakah, an au rual a ni.

Aizawla MJA-te'n lungawi lohna an lantir hi IPR minister Lal Thanzara, minister PC Lalthanliana leh MLA pali - Chalrosanga Ralte, Lalruatkima, Dr K Beichhua leh Lalrinawma ten an tlawh.

IPR minister Lal Thanzara pawhin thu sawiin, Assam police-te'n Mizo journalist-te dîm lo taka kut an thlak leh hmeichhiate pawh an zuah lo chu Mizoram sorkarin pawi an tih thu leh a dem thu a sawi a; thil thleng chungchang chu Assam sorkara IPR department changtu chief minister Sarbananda Sonawal-a hnenah a thlen a, hliamte leh bungraw chhiateah zangnadawmna pe tura a phût thu a hrilh tih a sawi bawk.

MJA sit-in demonstration hi Lungleiah chuan Lunglei Venglaia police station bulah neih a ni a, Lungleia MJA member-te bakah, Hnahthiala MJA member-te an tel ṭha hle. Champhaiah chuan Vengthlanga Darthangvunga Traffic Point-ah hun hman niin, Lawngtlaiah chuan Press Club-ah hun hman a ni.

Kolasib-ah chuan Bawrhsap pisa tualah huaihawt a ni a; Serchhipah chuan Serchhip Bazar tualah huaihawt niin Serchhip bakah, Thenzawl leh North Vanlai­phaia MJA member-te an tel. Mamitah chuan Charkawnah huaihawt a ni a, Siaha-ah pawh sit-in demonstration hi neih a ni.