Union Home Minister-in CM Hawla lehkha thawn : State 2 CS inbe turin ko

Union Home minister Rajnath Singh chuan, tun hnaia Bairabi Zophaia Assam police-te leh MZP-te intihbuai chungchangah nimin khan chief minister Lal Thanhawla hnenah lehkha a thawn. Nimin vek khan union Home ministry chuan, Mizoram leh Assam Chief Secretary-te inbe turin ruahmanna a siam.

Rajnath Singh hian a lehkhaah chuan, Mizoram leh Assam sorkarte'n remna leh ralmuanna an vawn nun a ṭul thu ziakin, tuna buaina thleng mek chu inhriatthiam tawnnaa chinfel a ṭul thu a tarlang a, "Union Home Secretary hnenah state pahnih Chief Secretary-te kar leha inbiaktir turin ka hrilh a, a ṭul a nih chuan state pahnih Chief Minister-te pawh inbe tura ruahman a ni ang," a ti.

Home Minister chuan, Mizoram leh Assam sorkarte'n Bairabi Zophaia buaina thleng chu titawp tura hma an lak ve ve a beisei thu leh, Bairabi-a mipui punkhawmna awm lo tura hma an lak a beisei thu a tarlang bawk.

Bairabi Zophaia thil thleng chungchang hi chief minister Lal Thanhawla chuan March 12, Thawhṭanni khan Union Home Minister hnenah a thlen a, state pahnih hotute an inbiak theih nana hma la tur leh a ṭul anga hma la turin a ngen a ni.

Nimin vêk khan Ministry of Home Affairs chuan meeting notice a chhuah a, Mizoram leh Assam chief secretary-te meeting neih hun atan March 20, 2018 tlai dar 4 a ruat a; a hmun tur chu New Delhi-a MHA pisa, room no. 113-ah a ni. Meeting hi MHA Secretary-in a kaihruai ang a, state pahnih chief secretary-te bakah, Intelligence Bureau director Rajiv Jain pawh tel tura tih a ni.