KHAWTHLIR

Panel of Chairman
Nimina Assembly session-ah speaker Hiphei chuan Panel of Chairman turte a ruat a; chungte chu - Nihar Kanti Chakma, T Sangkunga, Lalruatkima leh Lalrinawma te an ni.

Thisen pe
Sailam Branch KṬP chuan March 12, Thawhṭanni khan Aizawl Civil Hospital tan thisen unit 63 an pe a, a petute mipa 47 leh hmeichhia 16 an ni.

Vanglaini tihdikna
Nimina chhuak Vanglaini-a Rev. C. Chanchinmawia thih thu tarlanah, Bawngkawn veng anga tarlan a ni a, Bawngkawn ni loin, Ramhlun North zawk a ni a, a vuina inkhawm pawh Ramhlun North biak-inah neih a ni.

Heroin man
Central YMA hnuaia SRS leh Excise & Narcotics department chuan, March 12, Thawhṭanni zan dar 9:30 khan Lalramnghaka (45) s/o Zothanga leh a nupui Rakili, Rangvamual Mel-3 te hnen aṭangin heroin Hawng 10 an man. Nimin tlai dar 3 khan Lalramchuani (26) w/o Lalrintluanga, Zokhawthar hnen aṭangin Electric Venga maxicab stand-ah heroin hawng 4 an man bawk.

Tlan phal lo
Lunglei SP chuan thupek chhuahin, Lunglei-Aizawl World Bank Road-a Pukpui leh Tlawng inkarah kawngpui thawm ṭhat mek a nih avangin Pukpui leh Tlawng inkarah lirthei eng pawh tlân tlang phal a nih loh thu a tarlang. Thupek hian kawng siam zawh a nih hma a huam ang.

Punkhawm khap
March 13-29, 2018 chhunga Mizoram Legislative Assembly budget session neih a nih dawn avangin, Aizawl Sub-Divisional Magistrate chuan session chhung zawng chu Treasury Square-a Head Post Office leh Raj Bhavan chhim lam gate inkarah vantlang, politics, sakhuana leh thil dang kaihhnawihah mipui pun khawm phal a nih loh thu a puang.

College khâr titawp
Mamit College Students' Union-in an college-a assistant Sapliannguri, Forest office-a sawn tawh, Mamit College-a dah let leh phûtin Mamit College an khâr a, ni hnih chhung an khar hnuah nimin khan inremna an nei a, hei vang hian vawiin aṭangin Mamit College chu hawn leh ṭan a ni dawn.