Assembly Budget Session tan a ni

Mizoram Legislative Assembly Budget Session chu nimin khan Assembly House-ah ṭan a ni. Inkhawm ṭan a nih hnuah Governor Lt.Gen. Nirbhay Sharma-a'n thu sawiin, Mizoram sorkar hmalakna hrang hrangte a sawi.

Governor chuan, kum liam taa fûrpui chu Mizorama fûrpui rei ber a nih thu sawiin, "Mipui huapzo hmasawnna, eizawnna siam­sak, inkalpawhna ṭha leh nun dan hrisel zawkte ngaih pawimawh ber a ni," a ti a; Legislative Assembly member-te chu an mawhphurhnate hre thar leh a, mipui tana thawk zel turin a sáwm.

Sum inrenchemna kalpuia (financial propriety), langtlang tak (transparency) leh an thuthlukna siamah mawhphurhna la (accountable) turin Larsap chuan MLA-te a chah a, "Sawihona hlawhtling tak in neih theih nan duhsakna ka hlan a che u," a ti.

Governor sawi danin, Central sector mission panga - Swachh Bharat Mission (Urban), National Urban Livelihood Mission (NULM), Atal Mission for Rejuvenation and Urban Transformation (AMRUT), Housing for All (Urban) leh Smart Cities Mission-te chu kalpui mek a ni. November 29, 2017 khan president Ram Nath Kovind chuan Basic Services to Urban Poor (BSUP) hnuaia chenna in sakte a hawng a ni.

Lt.Gen. Nirbhay Sharma chuan, NITI Aayog-in a vawi khatna atana Health Index a siamah Mizoram chu state lian lo (small state) zingah pakhatna a ni a, NLUP avangin kum ruk kal ta chhung khan Mizoramah tlang rama thlawhhma lak 31.37%-in a tlakhniam phah niin a sawi.

Governor tarlan danin, Tuirial Hydro Electric Project chu sorkar kum kal laia zawh hman beisei a ni a, megaqatt 210 pe thei tur Tuivai Hydro Electric Project siam turin sorkarin NEEPCO thawhhona thuthlung a ziahpui.

District pali - Aizawl, Champhai, Kolasib leh Serchhip-te chu páwna inthiar awm lohna, open defecation free (ODF)-ah puan a ni tawh a; Siaha leh Mamit-ah endik mek niin, Lunglei leh Lawngtlai district-te pawh March 2018 tawpah ODF-a puan hman beisei a ni.

Kum 2017-18 chhungin Supply department hnuaiah kudam 17 sak a ni a, NABARD loan hmangin kudam 27 sak belh tum a ni. Fûrpui laia buhfai a harsat loh nan supply center 47-ah buhfai chhêk khâwl a ni.

Mizoram chu India hmarchhak biala RUSA kalpui ṭha ber leh India rampum huapa kalpui ṭha berte zinga mi a ni a; Lunglei Pûkpuia Mizoram Engineering College sak hna chu March 2018-ah zawh hman beisei a ni.

Kum 2017-18 chhung khan kawngpui km. 62.63-a thui formation cutting leh km. 118.72-a thui blacktop hna thawh a ni a; km 580.98-a thui kawngpui 42-te chu siam mek a ni. Mizoram PWD-in km. 1465.938-a thui national highway 11 an enkawl.

Nimin Assembly Session-ah hian Assam-a Mizoram a beh laia MLA January 28, 2018 a thi Lalchhunga Chinzah (86), Lawngtlai leh Union Territory kan nih laia MLA March 7, 2018 a thi J Kapṭhianga sunna hun hman a ni.

J Kapṭhianga hi April 10, 1929-ah Kelsih khuaah a piang a, kum 1962 aṭangin politics-ah a zuang lut a ni. Kum 1978 MLA inthlanah Khawbung bial aṭangin MLA atan PC ticket-a thlan tlin a ni a, Protem Speaker atana ruat niin, Chief Whip Assembly Rulling Party-ah a ṭang a ni. Kum 1989 aṭangin lung na a nei ṭan a, January 28, 2018 ah a hritlang a dam theih loh avangin Aizawl Civil Hospital-ah admit a ni a, March 7 khan zing dar 5:20 khan a thi a ni.

Lalchhunga Chinzah hi Pawi Lakher Regional Council (PLRC)-ah ṭum eng emawzat member atana thlan tlin a ni a, chairman leh chief executive member nihnate pawh a chelh a ni. Kum 1968 khan Assam MLA atan Chhimbial aṭangin thlan tlin a ni a, kum 1968-69 chhung MLA leh PLRC CEM nihna a chelh kawp a ni.

Lalchhunga Chinzah hi Lairam Christian Medical Centre-ah January 7, 2018 khan thawhah avangin dah luh a ni a, January 28 khan a thi a ni.