MPC hruaitute term pawhsei a ni
MPC party chuan nimin khan Aizawla an pisaah State Council Meeting an nei a, senior vice president-in kaihruaiin, president Lalhmangaiha Sailo-in thu a sawi. MPC party hruaitu, office bearer-te term chu kum khat atan an pawtsei.
Lalhmangaiha Sailo chuan, MPC party chu kum 43 a ding tawh tih sawiin, "A lungphum innghahna 'Kan ram, kan hnam, kan sakhua a him tur a ni,' tih a ni. Sorkar ṭha, rorelna ṭha a awm theih nan kan thupui dikna, rinawmna leh taimaknate hi theihnghilh lo ila, kan hlutin kan nun chhuahpui reng tur a ni," a ti.
MPC President chuan, tun hnaia Bairabi Zophaia thil thlengin an rilru a khawih na hle tih sawiin, "Ramri buainain min la tlakbuak zel a, tuna buaina hi Mizoram leh Assam inkara thuthlung bawhchhiatna vang a ni. Ram inchuh chhungah inhriattir hmasa loin kut thlak loh tur tih a ni a, Assam-in ram inchuhah khelmual an lo lai duai mai a, Assam hian thuthlung an bawhchhia a ni," a ti a; Mizo ṭhalaite pawh Zofate Chawlhbûk sa turin an che chhuak ve ta tih a sawi.
Lalhmangaiha Sailo chuan, Mizoram chhungah Assam a inhrosa a, duh tâwkin Mizote an vua a, an kâp hliam tih sawiin, "Kan hotute leh police-te a bibo tlat a! Eng vangin nge sorkar hian security force a pek mai loh chhan sawifiah turin sorkar kan phût. MZP rilru a ná a, mipui rilru a ná a, hnam angin kan mualpho a ni," a ti.
Zoram Peoples' Movement (ZPM) chungchang sawiin Lalhmangaiha chuan, "MNF ni lo, Congress ni lo, ZPM ṭangrual pawl a lo ding ta a, ZPM sorkar thar piang turah hian Mizoram mipui ṭawiawmna kan ngen a ni," tiin, ZPM-a tel turin mipui a sáwm.
MPC meeting hian resolution an siam a; kum 1875-a Mizoram leh Assam ramri chauh chu MPC pawm a ni a, a hnua ramri siam chu Mizote hriatpui loh leh barhluih ramria an ngaih thu leh, ṭhangtharte'n ramri humhalh duhna an nei mek chu an thlawp thu an tarlang a; "Mizoram chhung, a neitute phalna ngeia chawlhbuk satute Assam police-in kut an thlak a, silai an hmetpuak hi kan dem tak zet a, Mizo mipui hnenah ngaihdam an dil kan phût tlat a ni," an ti.
MPC party policy leh programme-te chu Mizoram dinchhuahna tling leh awmchhuna an ngaih thu sawiin, an policy leh programme-te tihpuitlinna tura pawl hrang hrang thawhhona ZPM a piang ta chu lawmawm an tih thu leh, kum 2018 MLA inthlanah ZPM-in sorkarna a siam ngei an rin thu an tarlang bawk.