Party pathumin chawlhbûk sak ngei an duh

Eptu party pathum - MNF, MPC leh ZNP hruaitute chu nimin khan an inhmu khawm a; thuchhuah inṭâwm siam­in, ramri humhalhna atana MZP hmalakna, 'Zofate Chawlhbûk' chu sak ngei ni se an tih thu an tarlang.

Party pathumte thu­chhuah chuan, MZP-in Bairabi Zophaia chawlh­buk sak an tumnaah boruak lum tak a awm lai leh buaina lian zawk thleng thei tur hre reng chunga ngawi rengah sorkar puhin, pawi an tih thu leh Mizoram sorkar an dem thu a tarlang a, "Assam police-te'n MZP hnatlang leh media-te zalenna rapbet a, kutthlak mai duh tâwk lo a, silaia an kap zui hi kan dem tak zet a ni," a ti.

Mizoram-Assam ramri chungchanga buaina chhuak ṭhinah sorkar insawithiam leh ṭhin chu a chinfelna ni loa an hriat thu sawiin, "A damdawi awmchhun Central sor­kar kaihhruaina hnuaia Boundary Commission din ngei a ṭul kan ti," an ti a; Boundary Commission din turin Mizoram sorkarin a rang thei ang bera hma la nghal tura an phut thu an tarlang.

MZP leh media mite'n hliam tam tak an awm laiin an thlavang sorkarin a hauh lo nia sawiin party pathumte chuan, "A vanduaithlak kan ti hle a ni," an ti a; Mizoram sorkar chu police kut phuar tlat­ah puhin, vanduaithlak an tih thu an sawi.

Eptu party pathumte chuan, nimina Chief Minister-in kohhran, political party leh tlawmngai pawl hrang hrang hruaitute nen inhmuh khawmna a koh­ah thu ngaihtuah tur leh sawiho tur (agenda) tarlan a nih loh avangin MNF, MPC leh ZNP-te chuan tel ṭul loah an ngaih thu an tarlang bawk.