MZP-in chawlhbûk sak an ṭhulh rih Zophaiah Mizoram police 400 vel awm mek

Mizo Zirlai Pawl (MZP)-in nimina Bairabi Zophaia Zofate Chawlhbûk sak tuma hnatlang an koh chu an ṭhulh rih a, March 20, 2018-a Mizoram leh Assam chief secretary-te inbiak hun nghah phawt an rel. MZP chuan, thil ṭha zawk beiseia sawn rih an nih thu sawiin, mipui hriatthiamna an ngen. Bairabi Zophaiah hian Mizoram police 400 vel an awm mek.

Nimin zinga MZP thuchhuah tarlan danin, chawlhbuk sak an tum chungchangah, ṭhulh rih lo tura ngenna an dawng nual a, March 13, Thawhlehniah Central YMA, MUP, MHIP leh MSU-in sawn rih turin an ngen a ni. March 13 zanah Mizoram Chief Minister leh Home Minister-te'n an ngen bakah, Mizoram Kohhran Hruaitute Committee (MKHC) pawhin an ngen bawk.

Ngenna hrang hrang a awm chungin MZP chu a dinna ngaiah a ding zel tho a, mahse, March 13 tlai leh zan lama thil thlen dan enin, hmanhmawh takin zanlai dar 12-ah MZP Executive Meeting an nei a, thil ṭha zawk beisei vangin a hun sawn a rel ta tih an tarlang.

MZP chuan, March 13 tlai lamah Union Home Secretary-in state pahnih chief secretary-te March 20-a inbe tura a tih thu hriat a ni tih sawiin, "Kan hma lawkah state pahnih an inbe dawn chunga lo chêt hi khawvel mitah a mawi lo thei a, Mizoram tan a ṭha lo thei ang tih ngaihdante a awm. Hei hi mi tam takin a hun sawn tura MZP an ngen chhan pakhat a ni," an ti.

Hetih rual hian MZP chuan, March 13 tlai tawh taka Kolasib district pumah Cr.PC 144 puan a ni leh zanah Aizawlah Cr.PC 144 puan zui a ni ve leh a, Aizawl leh Kolasib district-ah mi panga aia tam awm khawm khapna puan a ni tih sawiin MZP chuan, "Chawlhbuk sak tum tinzâwn ràna tih a nih avangin ná kan ti hle," an ti a; Cr.PC 144 puan avangin hnatlang tura thawk chhuakte leh Mizoram police an innek thei tih sawiin, Mizo leh Mizo inbeih chu an duh dan a ni lo tih an tarlang.

MZP chuan, Zophaiah police inring renga awmte'n hnatlan hun an nghak kher hi MZP duhsaktute ngaih ti ṭha lotu nia sawiin, Mizoram sorkarin an hmingchhiatna khuh nan, silai hmeh puah chhuanlamah an hmang nia an hriat thu an sawi a, "Hnam hnatlang neih dawnah tak Cr.PC 144 puanga MZP

tihṭhuanawp tum a nih avang leh ramri vei tura Mizoram sorkar koh eih tumin MZP chuan total bandh huaihawt a tum a ni," an ti.

Bairabi Zophai hi nimin khan Kolasib district magistrate R Zarzosanga'n nimin khan a tlawh a, Zophaia Mizoram police duty mekte chu boruak muanawm a awm zel theih nan theihtawp chhuah turin a chah. Zophaia sorkar hmalaknate chu 1st. IR commandant HL Thangzuala a sawipui bawk.

Sorkar thuchhuah tarlan danin, Zophaiah hian Mizoram police eng emaw zat an duty mek a, nimin khan Aizawl aṭangin medical team Dr James RE Mawia kaihhruainain ambulance pahnih nen an thleng ve leh a ni.

DIG (Headquarters) Lalbiakthanga Khiangte chuan March 13 khan Zophaia Mizoram police tirh belhna tur order a chhuah a, 1st. MAP, 3rd. MAP leh 5th. IR aṭangin police platoon khat ṭheuh kal tura tih a ni.

Thu dawn danin, DIG thupek ang hian March 13 zan khan police eng emaw zat an kal belh a, a ṭhente erawh chu Kawnpui leh Kolasib-ahte an duty bawk a; tunah hian 1st. IR, 2nd. IR, 3rd. IR, 4th. IR, 5th. IR, 1st. MAP leh 3rd. MAP aṭangin Bairabi Zophaiah police 400 vel an duty mek a; armed police aṭang chuan 2nd. MAP aṭang chiahin police tirh a ni lo.