Assembly House-ah member pahnih sûn

Nimin khan Assembly budget session ṭan a ni a; inkhawm ṭan a nih veleh session hnuhnung ber leh tun session inkara House member hlui thi mi pahnih - J Kapṭhianga leh Lalchunga Chinzah te sûnna hun hman niin, sûn nan minute khat chhung member-te ngawi rengin an ding.

J Kapṭhianga leh Lal­chunga Chinzah-te chan­chin leh uina thu House leader Lal Than­hawla'n a sawi a, opposi­tion lam aṭangin leader Van­­lalzawma'n uina thu a sawi.Chumi zawhah C Ngunlian-chunga, H Zothangliana leh R Romawia ten thu an sawi bawk.

J Kapṭhianga (89) hi April 10, 1929-ah Kelsih khuaah a piang a, zirna lamah high school thleng a kal a, kum 1950-1961 chhung sipaiah a ṭang.

Kum 1962-ah politics-ah a lut a, kum 1978-a Mizoram Assembly inthlan vawi hnihnaah PC party ticket-in Khawbung bial aṭangin thlan tlin a ni. Kum 1990 hnu lamah politics-ah a inhmang tawh vak lo a, March 7, 2018 zing dar 5:20-ah a thi.

Lalchunga Chinzah (86), Lawngtlai chu thiamna lamah B.A a ni a, zirtirtu hna a thawh mek laiin, kum 1958-ah Pawih-Lakher Regional Council member atan Bualpui NG bialah chuhtu dang awm loin a tling a, PLRC-ah chairman a ni. Kum 1964 leh kum 1970-ah PLRC inthlanah Lawngtlai bial aṭangin thlan tlin a ni leh a, PLRC chu district council-a hlan kai a nih hnu, kum 1973-ah chief executive member a ni.

Lalchunga Chinzah hi kum 1968-ah chhim bial aṭangin Assam Assembly-ah member (MLA) atan thlan a ni a, kum 1988-ah LADC-ah Paithar bial aṭangin thlan tlin leh a ni. Ṭum hnih LADC-ah CEM a ni bawk. Lalchunga hi January 28, 2018 zing dar 9-ah a thi a ni.