Hnatlan ṭhulh vangin MKHC-in lawmthu an sawi

Mizoram Kohhran Hruaitute Commitee (MKHC) chuan thu­chhuah siamin, MZP-in March 14, Nilainia Zofate Chawlhbuk sak an tum vanga boruak ṭang tak a awm laia sorkar, MKHC leh NGO dangte ngenna anga hnam hnatlang an ṭhulh chu lawmawm an tih thu an tarlang.

MKHC chuan, ramri buai chung­changah Mizo tlangvalte, ralthuam keng ve lo leh chanchinbumite kut­thlak an ni chu an dem tak zet thu an sawi a; "Ramri buai hi Mizoram leh Assam sorkar aiawhte'n ṭha taka inbiakna buatsaih a, tharum tel loa chinfel dan a awm ngei kan ring a, hemi atan hian chak taka hma la turin kan sorkar hotute kan ngen a ni," an ti.

MKHC chuan, buaina tipunlun zawng leh tharuma innêkna chawk tho zawnga thu ziah leh tihchhuahte chu ti lo turin mi tin an ngen a; Pathian hnena ṭawngṭai chunga ram tana thawk turin mipui an sáwm bawk.