Covid-19 vangin damdawi dawrte an inhralh nasa

Aizawl mipuite Covid-19 vanga an chiai nasat avangin Aizawl khawpui hmun lunlai deuh leh damdawi-in lian deuha damdawi dawrte March chawhma lama mipuiin an dawr dan chungchang Vanglaini chuan a zirchiang a, hemi hun chhung hian Aizawl khawpuiah chuan vitamin C, hand sanitizer leh disposable surgical/medical mask-te mipuiin an lei zo chak hle a, damdawi dawr ṭhenkhatte chuan ṭum dang aiin a let engemawzatte'n an hralh chhuak tam.

Vanglaini in Aizawl hmun lunlai deuha damdawi dawr leh damdawi-in pahniha damdawi canteen-te inhralh dan a zirchiannaah chuan disposable surgical/medical mask hralh a kal zual bik hle a, dawr ṭhenkhat chuan mipuiin daihzai zawka an lei theih nan ni khata lei/hralh theih tur zat bituk an siam a ni.

Disposable surgical/medical mask chu damdawi-in tan bik deuh chauh box 2 (200 piece) an kawl ṭhin a, mimal leitur an kawl ngai lo. Covid-19 boruak avanga mipui mamawhna a san tak avangin India ram hmun hrang hrangah a man a to a, hei vang hian a manto in an chah a, mahse mipuiin daihzai zawka an chan theih nan ni khatah mi panga aia tam hnenah an hralh chhuak lo. Hand sanitizer chu hospital-a nau neihna leh in zaina a hman tura an stock chauh a awm tawh a,  mipui leitur stock an nei tawh lo. 

Vitamin C pawh a hma kha chuan kar khat chhungin box 1 vel an tla ṭhin, mahse tunah chuan stock a awm mumal tawh lo a, glove pawh ni hnih thum chhungin piece 300 chuang an hralh zo hman a ni.

Hand sanitizer hi a hmaa ni khata 2/3 hralh ṭhin khan March 1-10 chhung vel khan nikhatah 100 bawr vel an hralh ṭhin. Ni khatah vitamin C box 5/6 vel an hralh ṭhin a, tunah chuan nikhatah box 100 chuangte an hralh. Surgical mask hi tun hmain thlakhat­ah piece 100 te an hralh ṭhin, whole sale & retail dawr an nih bawk avangin tunah chuan nikhatah piece 20,000 chuang an hralh chhuak.

Hand sanitizer chu order a awm chauhin an la a, vitamin C erawh an la ngai lo. Mask chu March thla chhungin 5000-6000 bawr vel an hral tawh.

Vitamin C chu nikhatah box 60 vel an hralh, a hma chuan nikhatah box 10-20 vel an hralh ṭhin. March thla tir lam khan chawhrual­in mask chu darkar chanve chhung­in box 10 chuang hralh zel ang an ni a, tunah chuan stock an nei tawh lo.

Ni thum chhungin hand sanitizer case 10 an hralh zo a, mipuiin rualkhai zawka vitamin C an chan theih nan mi pakhatah strip 3 bak an hralh lo. Mask chu kar thum chhungin 75,000 chuang an hralh hman a, hand sanitizer siamna tur chi bawlhhlo an zawrh tel avangin mimal leh damdawiin hrang hrang hnenah an hralh chhuak bawk. 

Mi pakhatah mask panga zel hralh turin an sem ruala, hand sanitizer thla hnih daih an kawl ṭhin chu ni li chhungin a zo veka, damdawi-in hman tur bikin an pharmacies-te'n hand sanitizer an siam chawp a ni. Vitamin C pawh ni 2/3 chhungin thlakhat daih tura an stock chu a zo vek a, mi pakhatah bawm hnih aia tam lo hralh turin an ruahman tawh.

Mask stock sa an nei tam loa, ni khatah piece 200 an hralh zo vek. Vitamin C pawh kar khata box 10 vel hralh ṭhin khan ni khatah box 20 chuang an hralh hman a ni.

Tun hmaa kar khata Vitamin C box 10 vel hralh ṭhin khan tunah chuan nikhatah box 30 chuang an hralh a, hand sanitizer pawh nikhat­ah box 20 chuang an hralh. Tun hma chuan ni khatah mask hralh mumal ngai lo khan nikhat chhungin 3,000 chuang an hralh zo a ni.

Kar khat chhunga vitamin C box 20 vel hralh ṭhin khan ni hnih chhungin box 200 chuang an hralh zo.

A man toin mask 5,000 an chah a, mahse a to avangin an hralh chhuak rih lo, vitamin C chu thlakhata case 3 vel hralh ṭhin khan ni 2/3 chhungin case 10 chuang an hralh zo. 

Vitamin C nikhata strip 2 vel hralh ṭhin khan nikhatah strip 200 chuang an hralh zo hman a ni.

Heng damdawi zawrhna hmunahte hian mi tam tak chuan vitamin C, hand sanitizer leh disposable surgical/medical mask-te hi lei tur an la zawng renga, hmun tam takah chuan stock mumal an nei tawh loa, mask leh hand sanitizer-te chu an chahna rate leh size a zirin a MRP angin an hralh a, vitamin C pawh a man pangngaiin an hralh a, mask bik hi a man to avanga la lo leh la si zuar chhuak lo eng emaw zat an awm bawk.