Session-ah ramri chungchang sawi a ni : HM-in DC-te thil tih sorkar zah lohnaah a ngai
Nimin khan Assembly session-ah Bairabi Zophaia tun hnaia buaina chhuak chungchang leh ramri chungchang sawi chhuah a ni. MNF member Lalruatkima'n special mention hun hmangin Zophaia thil thleng chungchang a sawi a; Home minister R Lalzirliana chuan, Aizawl DC leh Kolasib DC-in Cr.PC 144 an puang chu state sorkar zahlohnaa a ngaih thu a sawi.
Lalruatkima chuan Bairabi Zophaia MZP-in Zofate Chawlhbuk an sak leh ṭhiahsak an nih dan te, sak leh an tum dan leh buaina a chhuah dan te, silai an hmeh puah thu leh chanchinbumite thlenga kut an thlak thu a sawi lang a, "Mizoram chhungah Assam sorkar chuan Cr.PC 144 puangin magistrate-te nen an rawn thawk a, dan bawhchhiaa thuneihna an rawn lek ngawt mai hi Mizote min thamlohzia lantirna a ni," a ti.
Lalruatkima chuan, "Assam sorkar chet dan leh hmalak dan hi ṭhenawm state-te hmuhsitna leh diriamna a nih avangin an demawm tak zet a, hliamte kan tawrhpuiin, an inenkawlna senso hi sorkarin pe ngei se ka duh," a ti bawk.
MLA Lalruatkima'n special mention hun a hman zawhah Home minister-in Bairabi Zophaia thil thleng leh a kaihnnawihte a sawifiah a; Congress Legilature Party (CLP)-in Zophaiah chawlhbuk sak ngei an rêl thu a sawi nawn a, Aizawl DC leh Kolasib DC-te'n March 13, Thawhlehniah an huam chhung ve vea Cr.PCC 144 an puan avangin a vui thu a sawi.
Home Minister chuan, March 11-a CM Bangla conference room-a CLP emergent meeting-ah resolution siamin, Zophaiah Zofate Chawlhbuk sak ni se, tia an rel thu sawiin, "Kan thinrim em avangin he laiah hian chawlhbuk sak ngei tur a ni, kan ti a. A hma chuan status quo maintain-a awm tur a ni tih kha kan dinna a nih laiin, khatianga Assam police-te an chêt takah chuan kan thin a ur tlang a, kan vaiin kan thin a ur a, CLP-in chawlhbûk sak tur a ni tih resolution kan pass a, CM-in a approve thlap a ni," a ti.
R Lalzirliana chuan, Bairabi Zophaiah chuan engtik ní-ah emaw chuan Zofate Cchawlhbuk sak ngei an tum thu a sawi chungchangah Lalruatkima chuan, 'Engtik ni emaw' tih chu a rei theih avangin sorkarin hma la zui nghal se, tiin a rawt a; Lalzirliana chuan, "Kan hmanhmawh dan a inang lo deuh a, hma kan la nghal char char a ni," a ti a; tunah chuan ni leh thla pawh a la ral loh thu a sawi.
Home Minister chuan, Chief Minister remtihnain Zophaiah bûk sak ni rawh se, an ti a, bûk sak ní tur takah DC-te'n Cr.PC 144 an thuneihna hmangin an puang tih a sawi a, "Kha kha an tih turah ka ngai lo reng reng. Sorkar an ráwn tur a ni. HM ka nih angin min rawn ráwn ve tur a ni," a ti.
HM R Lalzirliana chuan, DC-te chu IAS an ni a, an control theih loh chin a awm thu sawiin, "Central control an ni a, amaherawhchu, kan state hnuaia thawk an ni a, hetiang an ti dawn a nih chuan, CLP-in lungrual takin a pass a, CM-in approve tawh a. Hei hi inzah lohna nasa tak a ni. Hetiang hi chu kan ramah hian thleng tawh lo se la ka duh khawp mai," a ti. DC-te thil tih dan chu House chhunga awmte zingah ṭha ti an awm a rin loh thu a sawi.
Home Minister chuan, Zophaia Mizote chunga Assam sorkar thil tih dan chu Mizoram sorkarin an dem thu sawiin, "Assam sorkar, thu petute leh police-te kan dem em em a ni. Khatianga zirlai pawisawi lo an bei dawn a nih a, an nawr let dawn a nih chuan, silaia inkah nghal mai tur a ni lo reng reng. A hmasain tear gas-te an ti ang a, aurinna nen kan ti dawn a ni, an ti ang a, an sawi hmasa tur a ni," a ti.
R Lalzirliana sawi danin, Assam sorkar leh police thil tih danah Mizoram sorkar a lungawi loh em avangin Union Home Minister-ah Chief Minister-in March 12-ah lehkha a thawn a, dan loa Assam thil tiha an lungawi lohzia an hrilh a ni.
House leader Lal Thanhawla pawhin Bairabi-a buaina chhuak chu pawi a tih thu a sawi a, "Assam hian state ṭhenawm dangte nen pawh ramri buai a nei a, tu tan pawh chinfel mai a harsa. Bairabi dáia buaina hi political party-te inchirthehna atan hman loh ni se tih pawh hi a ṭhahnemngai zualte duh dan a ni," a ti.
Bairabi-a Mizoram police-te tirh tur chungchang Congress Legislature Party-in an rel anga ngaih theih tur chu, "Thil hmanhmawhthlak bik a ni a, CLP-in a rel kha Chief Minister-in a pawmpui a ni," tiin a sawi.